ការិយាល័យកំពូលចិនទទួលបន្ទុកកិច្ចការហុងកុង គ្រោងនឹងធ្វើសន្និសីទកាសែតពាក់ព័ន្ធនឹងភាពរំជើបរំជួលនៅហុងកុង ក្រោយបាតុកម្មនៅចុងសប្តាហ៍ បានបញ្ជាក់ពីការប្រឈមកាន់តែខ្លាំងឡើងក្នុងការគ្រប់គ្រងចលនាបាតុកម្មនេះ ដែលគ្មានខ្លាចមេដឹកនាំ មិនអាចព្យាករណ៍បាន និងកាន់តែរីកសាយកាន់តែធំឡើងនោះ។
ការប៉ះទង្គិចគ្នាដោយហិង្សាមួយ បានកើតឡើងទៅហើយរវាងបាតុករ និងនគរបាលហុងកុង កើតឡើងនៅជិតការិយាល័យទំនាក់ទំនងចិន ស្ថិតក្នុងតំបន់ Sai Wan ។
ការប៉ះទង្គិចគ្នាដោយហិង្សានេះ បានកើតឡើងនៅថ្ងៃទី២នៃបាតុកម្មនៅហុងកុង រវាងក្រុមនគរបាល និងក្រុមបាតុករទាមទារលទ្ធិប្រជាធិបតេយ្យ ដែលបានខឹងសម្បារចំពោះវិធានការដ៏ឃោឃៅរបស់ក្រុមនគរបាល។
ការិយាល័យទទួលកិច្ចការនៅហុងកុង និងម៉ាកាវ ដែលនឹងរាយការណ៍ជូនគណៈរដ្ឋមន្ត្រីចិន គ្រោងនឹងធ្វើសន្និសីទកាសែតនៅថ្ងៃចន្ទនេះ ក្នុងទីក្រុងប៉េកាំង ដែលកាសែត South China Morning Post បានរាយការណ៍ថា វាគឺជាការធ្វើសន្និសីទកាសែតលើកដំបូងគេ ចាប់តាំងពីការបញ្ចប់ការគ្រប់គ្រងរបស់អាណានិយគមនិយមអង់គ្លេស កាលពីឆ្នាំ១៩៩៧។
ក្រុមនគរបាល បានបាញ់ឧស្ម័នបង្ហូរទឹកភ្នែក និងគ្រាប់កាំភ្លើងកៅស៊ូមកលើក្រុមបាតុករ ដែលព្យាយាមធ្វើដំណើរទៅកាន់ការិយាល័យទំនាក់ទំនងរដ្ឋាភិបាលចិន។
ក្រុមបាតុកររាប់ម៉ឺននាក់ បានគ្រប់គ្រងផ្លូវនៅជិតតំបន់ Sai Wan និង Causeway Bayលើកោះហុងកុង។
ទីក្រុងហុងកុង បានជួបប្រទះបាតុកម្មប្រឆាំងរដ្ឋបាល និងទាមទារលទ្ធិប្រជាធិបតេយ្យសម្រាប់ចុងសប្តាហ៍ទី៨។
គួរឲ្យដឹងថា ហុងកុងស្ថិតនៅក្នុងចំណោមទីក្រុងមានសុវត្ថិភាពជាងគេបំផុតនៅលើពិភពលោក ប៉ុន្តែបាតុកម្មកាលពីពេលថ្មីៗនេះ គេមើលឃើញការប៉ះទង្គិចគ្នាដោយហិង្សា រវាងក្រុមបាតុករ ក្រុមនគរបាល និងក្រុមអន្ធពាលពាក់ម៉ាស់កាន់ដំបង ដែលគេសង្ស័យថាជាសមាជិកក្រុមឧក្រិដ្ឋកម្ម។
បាតុកម្មនៅថ្ងៃអាទិត្យនេះដែរ គេមើលឃើញក្រុមសកម្មជនពាក់មួកការពារ និងវ៉ែនតា បានលើកប៉ារ៉ាស់ចេញនៅតាមទីតាំងជាច្រើនកន្លែង និងបានស្រែកពាក្យស្លោក “ដោះលែងហុងកុងឲ្យមានសេរីភាព”។
បាតុកម្មបានចាប់ផ្តើមឡើង ពេលដែលក្រុមនគរបាលបានជួបជុំគ្នានៅក្នុងឧទ្យានស្ថិតនៅកណ្តាលស្រុកពាណិជ្ជកម្ម មុនពេលក្រុមបាតុករ រឹងទទឹងជាមួយក្រុមអាជ្ញាធរ និងធ្វើដំណើរទៅលិចឆ្ពោះទៅកាន់ការិយាល័យទំនាក់ទំនងចិន ស្ថិតនៅតំបន់ Sai Wan និងដើរឆ្ពោះទៅកើត ទៅកាន់តំបន់ដើរផ្សារ Causeway Bay ។
ក្រុមនគរបាលរាប់ពាន់នាក់ បានរារាំងក្រុមបាតុករពីការចូលទៅកាន់ការិយាល័យទំនាក់ទំនងចិន។ អគារត្រូវបានព័ទ្ធជុំវិញដោយប៉ារ៉ាស់ប្លាស្ទិក ហើយបាវចនារដ្ឋាភិបាលចិន បានបិទនៅលើទ្វារមុខ៕