ផែនដីធំ និងភពក្រៅប្រព័ន្ធព្រះអាទិត្យ២ផ្សេងទៀត ត្រូវបានរកឃើញដោយផ្កាយរណប TESS របស់អង្គការអវកាស NASA ដោយពួកវា កំពុងតែគោចរណ៍ជុំវិញតារាមួយ ស្ថិតនៅចម្ងាយ៧៣ឆ្នាំពន្លឺពីផែនដីរបស់ពួកយើង។
យោងតាមការអះអាងរបស់ក្រុមអវកាសចរដែលដឹកនាំដោយលោក Maximilian Günther គឺជាអ្នកវិទ្យាសាស្ត្រមកពីវិទ្យាស្ថានស្រាវជ្រាវទីអវកាស និងតារាសាស្ត្រ Kavliនៃសាកលវិទ្យាល័យ MIT បានឲ្យដឹងថា ភពទាំង៣នេះ ស្ថិតនៅក្នុងចំណោមភពក្រៅប្រព័ន្ធព្រះអាទិត្យតូចបំផុត និងជិតបំផុតដែលត្រូវបានរកឃើញមកទល់នឹងពេលនេះ។
យោងតាមការសិក្សាស្រាវជ្រាវមួយដែលបានចុះផ្សាយនៅលើកាសែត Nature Astronomy បានឲ្យដឹងថា ប្រព័ន្ធតារាឈ្មោះ TOI-270 កំពុងតែធ្វើឲ្យមានការចាប់អារម្មណ៍យ៉ាងខ្លាំង សម្រាប់ហេតុផលជាច្រើន។ វាមិនដូចជាប្រព័ន្ធព្រះអាទិត្យរបស់ពួកយើងនោះទេ ភពទាំង៣នេះមិនប្លែកពីគ្នាទាល់តែសោះបើនិយាយពីទំហំរបស់វាវិញ។
មូលហេតុដែលគេហៅឈ្មោះថាជាផែនដីធំបែបនេះ គឺដោយសារតែវាមានទំហំធំ និងខ្ពស់ជាងផែនដីរបស់ពួកយើង តែវានៅទាបជាងភពអ៊ុយរ៉ានូស(Uranus) និងភពណិតទូន(Neptune)។
ដោយឡែកភព២ផ្សេងទៀត ត្រូវបានគេដាក់ឈ្មោះឲ្យថាជាអនុភពណិតទូន ដោយសារតែវាមានទំហំធំល្មមប្រហែលជាពាក់កណ្តាលនៃភព Ice Giant ស្ថិតនៅក្នុងប្រព័ន្ធព្រះអាទិត្យរបស់ពួកយើង។
ការកឃើញភពទំហំមធ្យមទាំង២នេះ គឺសំខាន់ខ្លាំងណាស់សម្រាប់ក្រុមអវកាសចរ ដោយសារតែពិភពបែបនេះ នឹងផ្តល់ទំនាក់ទំនងដែលបាត់បង់ ពិសេសពេលដឹងពីការបង្កើតភព។ ជាការពិតណាស់ថា គ្មានភពទំហំមធ្យមបែបនេះ មាននៅក្នុងប្រព័ន្ធព្រះអាទិត្យរបស់ពួកយើងនោះទេ៕
