អ្នកដែលចូលចិត្តលេងហ្គេម នៅពេលនេះទំនងជាចង់សាកល្បងហើយ ក្រោយកីឡាករវ័យក្មេងម្នាក់របស់សហរដ្ឋអាមេរិក បានឈ្នះលុយ៣លានដុល្លារកាលពីថ្ងៃអាទិត្យនៅរដ្ឋញូវយ៉ក ក្រោយដណ្តើមបានពាននៅការប្រកួតវីដេអូហ្គេមតាមអនឡាញដ៏ពេញនិយម Fortnite ។
កីឡាករ Kyle Giersdorf អាយុ១៦ឆ្នាំ មកពីរដ្ឋ Pennsylvania ស្ថិតនៅក្នុងចំណោមកីឡាករយ៉ាងហោច១០០នាក់ ដែលបានចូលរួមលេងហ្គេម ដណ្តើមប្រាក់រង្វាន់៣០លានដុល្លារ ពេលដែលប្រជាប្រិយភាពរបស់វីដេអូហ្គេមតាមអនឡាញមួយនេះ បានធ្វើទាក់ទាញការវិនិយោគទុនជាង១ពាន់លានដុល្លារ និងធ្វើឲ្យកើតមានកីឡាអាជីពមួយនេះ។
យោងតាមរបាយការណ៍ចុះផ្សាយកាលពីដើមឆ្នាំនេះ បានឲ្យដឹងថា ប្រាក់ចំណូលសកលបានមកពីកីឡា E-Sportមួយនេះ ឬការប្រកួតវីដេអូហ្គេមអាជីព បានកើនឡើងដល់១.១ពាន់លានដុល្លារក្នុងឆ្នាំ២០១៩ ពោលគឺកើនឡើងជិត២៧ភាគរយ បើធៀបនឹងឆ្នាំមុន ដោយសារតែប្រាក់ចំណូលកើនឡើងពីការផ្សព្វផ្សាយ ម្ចាស់ក្រុមហ៊ុនឧបត្ថម្ភ និងសិទ្ធិសារព័ត៌មាន ។
យោងតាមវែបសាយរបស់ Fortnite World Cup បានឲ្យដឹងថា ការលេងហ្គេមក្រោមស្លាកឈ្មោះ"Bugha" កីឡាករ Giersdorf បានឈ្នះវគ្គផ្តាច់ព្រ័ត្រ Fortnite World Cup ដោយរកបាន៥៩ពិន្ទុ ពោលគឺ២៦ពិន្ទុច្រើនជាងគូប្រជែងជិតបំផុតរបស់គាត់ គឺកីឡាករ Harrison Chang ។
នៅក្នុងបទសម្ភាស៍នៅក្នុងពហុកីឡដ្ឋាន Arthur Ashe ស្ថិតនៅក្នុងទីក្រុង Queens រដ្ឋញូវយ៉កកីឡាករ Giersdorf បាននិយាយថា លោកគ្មានពាក្យអ្វីត្រូវបរិយាយចេញនោះទេ លោកពិតជាសប្បាយរីករាយខ្លាំងណាស់។ អ្វីៗគ្រប់បែបយ៉ាងដែលលោកបានធ្វើ គឺតបស្នងមកវិញនូវលទ្ធផលបែបនេះ។ វាដូចឆ្កួតអញ្ចឹង។
ដោយដាក់ឲ្យប្រើប្រាស់កាលពីឆ្នាំ២០១៧ ប្រជាប្រិយភាពរបស់ក្រុមហ៊ុន Fortnite បានជួយឲ្យហ្គេម Epic Games កើនឡើងតម្លៃ១៥ពាន់លានដុល្លារកាលពីឆ្នាំមុន។ វានឹងប្រកួតប្រជែងជាមួយហ្គេមជាច្រើនទៀតដូចជា ហ្គេម Apex Legendsរបស់ក្រុមហ៊ុន Electronic Arts Inc និងហ្គេម PlayerUnknown's Battlegrounds របស់ក្រុមហ៊ុន Tencent Holdings Ltd ៕
Home ព្រឹត្តិការណ៍ថ្មីៗ ស្តេចវីដេអូហ្គេម Fortnite ដ៏វ័យក្មេងរបស់អាមេរិកឈ្នះប្រាក់រង្វាន់៣លានដុល្លារពីការលេងហ្គេមដ៏ពេញនិយមមួយនេះ