ក្រុមមន្ត្រីបានអះអាងថា មនុស្សយ៉ាងហោច១៧នាក់ ត្រូវបានសម្លាប់ និង១២នាក់ផ្សេងទៀត បានរងរបួស ក្រោយហេតុការណ៍ធ្លាក់យន្តហោះយោធាធន់តូចមួយគ្រឿងនៅតំបន់រស់នៅរបស់អ្នកស្រុក នៅជិតទីក្រុងរ៉ាវ៉ាល់ពីនឌី ប្រទេសប៉ាគីស្ថាន។
យន្តហោះរបស់អង្គភាពកងទ័ពអាកាសប៉ាគីស្ថាននេះ បានធ្លាក់កាលពីព្រឹកថ្ងៃអង្គារ។
សារព័ត៌មានក្នុងស្រុកបានរាយការណ៍ថា អាកាសយានិក៥នាក់ និងជនស៊ីវិល១២នាក់ បានស្លាប់ ។
យន្តហោះមួយគ្រឿងនេះ កំពុងហោះហើរហ្វឹកហាត់តាមទម្លាប់ ពេលដែលវាធ្លាក់ និងបង្កជាអគ្គីភ័យឡើង ធ្វើឲ្យឆាបឆេះផ្ទះអ្នកស្រុកអស់ជាច្រើនខ្នង។
គេនៅមិនទាន់ដឹងច្បាស់ភ្លាមៗនោះទេថាតើ មូលហេតុអ្វីបណ្តាលឲ្យយន្តហោះនេះធ្លាក់ ឬថាតើវាជាប្រភេទយន្តហោះអ្វីនោះទេ។
ទីក្រុងវ៉ាវ៉ាល់ពីនឌី ដែលស្ថិតនៅជិតរដ្ឋធានីអ៊ីស្លាម៉ាបាដ ជាកន្លែងដែលមូលដ្ឋានកងទ័ពស្ថិតនៅ។
មន្ត្រីកងទ័ពនៅកន្លែងកើតហេតុ បាននិយាយប្រាប់ទីភ្នាក់ងារព័ត៌មានរ៉យទ័រថា វាបានធ្លាក់បុកអគារអ្នកស្រុក។
ទីភ្នាក់ងារព័ត៌មាន AFPបានរាយការណ៍ថា ក្រុមអ្នកស្រុក ដែលអ្នកខ្លះនាំគ្នាយំសោក បានជួបជុំគ្នានៅជាកន្លែងដែលឧប្បត្តិហេតុកើតឡើង។
លោកមហាម៉ាដ សាឌីក គឺជាអ្នកស្រុកមួយរូប បាននិយាយថា លោកបានភ្ញាក់ឡើងឮសំឡេងផ្ទុះខ្លាំង ។ មនុស្សម្នា បានស្រែកភ្លាត់សំឡេង យើងបានព្យាយាមជួយពួកគេ ប៉ុន្តែយើងមិនអាចធ្វើអ្វីកើតនោះទេ ដោយសារតែអណ្តាតភ្លើងឆេះខ្លាំងពេក។
ដោយឡែក អ្នកស្រុកម្នាក់ទៀត បាននិយាយថា យន្តហោះបានឆាបឆេះជាអគ្គីភ័យឡើង មុនពេលដែលវាធ្លាក់៕
