[wai id="9"]
ប្រទេសកម្ពុជា នៅថ្ងៃអង្គារ បានហាមប្រាមពលរដ្ឋឥណ្ឌា និងជនបរទេសដែលធ្វើដំណើរមកពី ឬឆ្លងកាត់តាមប្រទេសឥណ្ឌា មិនឲ្យចូលកម្ពុជា«មួយរយៈ» ដោយឥតកំណត់ពេលច្បាស់លាស់ ដោយសារការព្រួយបារម្ភអំពីការឆ្លងរាលដាលវីរុសបម្លែងខ្លួនថ្មីដែលបង្កជាជំងឺកូវីដ១៩។ នេះបើយោងតាមក្រសួងសុខាភិបាលកម្ពុជា។
ពាណិជ្ជកម្ម
ការសម្រេច ដែលមានចុះហត្ថលេខាដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរ ក្រសួងដើម្បីប្រយុទ្ធនឹងជំងឺកូវីដ-១៩ ធ្វើឡើងបន្ទាប់ពីកម្ពុជាសង្កេតឃើញថា ការរាតត្បាតជាសកលនៃវីរុសបម្លែងថ្មីប្រភេទ B117 មានប្រភពមកពីប្រទេសអង់គ្លេស ទើបតែលេចចេញនូវវីរុសបម្លែងថ្មីមួយផ្សេងទៀតឈ្មោះ B1617 មានប្រភពចេញពីប្រទេសឥណ្ឌា ដែលមានការឆ្លងខ្លាំង និងមានភាពធ្ងន់ធ្ងរជាងប្រភេទ B117។ មួយវិញទៀត វិធានការនេះ គឺធ្វើឡើងខណៈដែលប្រទេសកម្ពុជាកំពុងរងនូវការរាតត្បាតធ្ងន់ធ្ងររួចទៅហើយ តាមរយៈព្រឹត្តិការណ៍ឆ្លងសហគមន៍ ២០កុម្ភៈ កន្លងទៅ។
ជាការកត់សម្គាល់ ប្រទេសឥណ្ឌា បានឆ្លងជំងឺកូវីដ-១៩ ក្នុងអត្រាខ្ពស់ជាង៣០ម៉ឺននាក់ ក្នុងមួយថ្ងៃ រយៈពេល៦ថ្ងៃជាប់ៗគ្នា គិតមកត្រឹមថ្ងៃនេះ។ រយៈពេល២៤ម៉ោង ចុងក្រោយនេះ ឥណ្ឌាមានអ្នកស្លាប់ដោយសារកូវីដ-១៩ ប្រមាណជាង ២ ៧០០នាក់ ដែលជាអត្រាស្លាប់ខ្ពស់បំផុតប្រចាំថ្ងៃ ខណៈមន្ទីរពេទ្យបានច្រានអ្នកជំងឺចេញទៅវិញ ដោយសារតែខ្វះគ្រែសម្រាក និងអុកស៊ីសែន៕