អ្នកនាំពាក្យឧទ្យាន គឺលោក Patrick Taylor បាននិយាយប្រាប់ CNNថា យន្តហោះប្រតិកម្ម F/A-18E Super Hornet របស់កងទ័ពជើងទឹកសហរដ្ឋអាមេរិក បានធ្លាក់កាលពីថ្ងៃពុធ នៅក្នុងឧទ្យានជាតិ Death Valley នៅចំណុចមួយដែលគេស្គាល់ថាជាជ្រោះសង្គ្រាមពិភពផ្កាយ ហើយភ្ញៀវទេសចរ៧នាក់ បានរងរបួសស្រាលដោយសារតែការធ្លាក់យន្តហោះនេះ។
ជាទូទៅ យន្តហោះយោធា មិនត្រូវបានអនុញ្ញាតឲ្យហោះពីលើឧទ្យានជាតិមួយនេះនោះទេ ប៉ុន្តែករណីលើកលែង ត្រូវបានធ្វើឡើងនៅចំណុចមួយនេះនៃឧទ្យាន Death Valley ពេលដែលវាក្លាយជាឧទ្យានជាតិ កាលពីរយៈពេល២៥ឆ្នាំមុន។
លោក Taylor បាននិយាយថា ទីស្រឡះល្អមួយនេះ បានក្លាយជាកន្លែងដ៏ពេញនិយមសម្រាប់ការទស្សនាការហោះហើរហ្វឹកហាត់របស់យន្តហោះយោធា។
យោងតាមការអះអាងរបស់កងទ័ពជើងទឹក បានឲ្យដឹងថា ការធ្លាក់យន្តហោះប្រតិកម្មនេះ បានកើតឡើងនៅភាគខាងកើតនៃមូលដ្ឋានទ័ពអាកាស Naval Air Weapons Station China Lake ស្ថិតនៅក្នុងរដ្ឋកាលីហ្វ័រញ៉ា។
លោកមេបញ្ជាការ Lydia Bock គឺជាអ្នកនាំពាក្យកងឯកភាពទ័ពអាកាស Joint Strike Fighter បាននិយាយនៅក្នុងសេចក្តីថ្លែងការណ៍ថា បុគ្គលិករុករក និងជួយសង្គ្រោះ បាននៅកន្លែងកើតហេតុ ហើយស្ថានភាពរបស់ពីឡុត មិនត្រូវបានគេដឹងនោះទេ។
«លោកបន្តថា ចំណែកឯមូលហេតុដែលនាំឲ្យយន្តហោះធ្លាក់ បច្ចុប្បន្នកំពុងស្ថិតក្រោមការស៊ើបអង្កេត។
ដោយឡែក កងទ័ពអាកាសនៃកងនាវាជើងទឹកសហរដ្ឋអាមេរិក បានចេញនូវសេចក្តីថ្លែងការណ៍តាម Twitter ដើម្បីប្រកាសពីករណីធ្លាក់យន្តហោះនេះ។
ពួកគេបានសរសេរនៅលើគណនី Twitterថា នៅវេលាម៉ោងប្រហែល១០ ព្រឹក យន្តហោះប្រតិកម្ម F/A-18E បានធ្លាក់នៅជិតជ្រោះសង្គ្រាមពិភពផ្កាយ ហើយប្រតិបត្តិការជួយសង្គ្រោះ កំពុងតែធ្វើឡើង៕
Home ព្រឹត្តិការណ៍ថ្មីៗ យន្តហោះប្រតិកម្មអាមេរិកធ្លាក់ដោយគ្មានមូលហេតុ ធ្វើឲ្យមនុស្ស៧នាក់រងរបួសនៅក្នុងឧទ្យានរដ្ឋកាលីហ្វ័រញ៉ា