នៅព្រឹកថ្ងៃចន្ទ ៥ ខែសីហា ឆ្នាំ២០១៩នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានព្រមានថា ការបំបែកនគរបាលចេញពីក្រសួងមហាផ្ទៃ នឹងធ្វើឱ្យមានភាពរញ៉េរញ៉ៃ ក្នុងការគ្រប់គ្រង ដោយសម្តេចបានស្នើឱ្យអ្នកដឹកនាំជំនាន់ក្រោយ រក្សាទុកនគរបាលឱ្យស្ថិតនៅក្រោមក្រសួងមហាផ្ទៃ ដោយផ្អែកលើបទពិសោធន៍ជោគជ័យរបស់រាជរដ្ឋាភិបាលនាពេលកន្លងមក។ ការថ្លែងបែបនេះ នៅក្នុងពិធីប្រគល់សញ្ញាបត្រវិទ្យាសាស្ដ្រនគរបាល ថ្នាក់បរិញ្ញាបត្រជាន់ខ្ពស់ ថ្នាក់បរិញ្ញាបត្រ និងវិញ្ញាបនបត្រ ជូនដល់និស្សិតនាយនគរបាលបន្តវេន និងសិក្ខាកាមជ័យលាភី ១,៤៦៥នាក់ នៅបណ្ឌិត្យសភានគរបាលកម្ពុជា។
សូមបញ្ជាក់ថា បណ្ឌិត្យសភានរគបាលកម្ពុជា គឺជាស្ថាប័នចំណុះឱ្យក្រសួងមហាផ្ទៃដែលបានធ្វើសកម្មភាពយ៉ាងសកម្មក្នុងការបណ្តុះបណ្តាលមន្ត្រីនគរបាល និងមន្ត្រីពន្ធនាគារ ដើម្បីលើកកម្ពស់គុណភាព និងសមត្ថភាពវិជ្ជាជីវៈមន្ត្រីនគរបាលជាតិ និងមន្ត្រីពន្ធនាគារទូទាំងប្រទេស ស្របតាមតម្រូវការរបស់សង្គមជាតិ និងស្តង់ដារគុណភាពដែលបានកំណត់។
គិតចាប់ពីឆ្នាំ២០០៧ ដល់ឆមាសទី១ ឆ្នាំ២០១៩នេះ និស្សិតនាយនគរបាលបន្តវេន សិក្ខាកាម និងសិស្សនគរបាល បានបញ្ចប់ការសិក្សានៅបណ្ឌិត្យសភានគរបាលកម្ពុជាមានចំនួនសរុប ៤៤.៩២០នាក់ ក្នុងនោះនារី ២.៤៤១នាក់។
