កូរ៉េខាងជើង បាញ់មីស៊ីល២គ្រាប់បន្ថែមទៀត ពោលគឺជាការបាញ់លើកទី៤ក្នុងរយៈពេលមិនដល់២សប្តាហ៍ ដើម្បីផ្គើននឹងសមយុទ្ធយោធារវាងកូរ៉េខាងត្បូង និងអាមេរិក ដែលបានចាប់ផ្តើមកាលពីថ្ងៃចន្ទ។
យោធាកូរ៉េខាងត្បូង បានអះអាងនៅក្នុងសេចក្តីថ្លែងការណ៍ថា កូរ៉េខាងជើង បានបាញ់មីស៊ីល២គ្រាប់ទៀត ចេញពីខេត្ត South Hwanghae ហោះឆ្លងកាត់តំបន់ឧបទ្វីបកូរ៉េ រួចហោះឆ្ពោះទៅកាន់សមុទ្រនៅភាគខាងកើត។
ខណៈពេលនោះដែរ សហរដ្ឋអាមេរិក បាននិយាយថា ពួកគេកំពុងតាមដានស្ថានភាពមួយនេះ និងពិគ្រោះយោបល់ជាមួយកូរ៉េខាងត្បូង និងជប៉ុន។
គួរឲ្យដឹងថា កូរ៉េខាងជើង បានបង្ហាញនូវការខឹងសម្បាររបស់ខ្លួនយ៉ាងខ្លាំងចំពោះសមយុទ្ធយោធារួមគ្នារវាងកូរ៉ខាងត្បូង និងសហរដ្ឋអាមេរិក ដែលបានចាប់ផ្តើមដំណើរការហើយកាលពីថ្ងៃចន្ទ។
ការធ្វើសមយុទ្ធយោធាប្រចាំឆ្នាំនេះ ត្រូវបានគេកាត់បន្ថយមកនៅទ្រង់ទ្រាយតូចប៉ុណ្ណោះ ប៉ុន្តែកូរ៉េខាងជើង បានអះអាងថា ពួកគេបានបំពានលើកិច្ចព្រមព្រៀងដែលបានឈានដល់ជាមួយប្រធានាធិបតីដូណាល់ ត្រាំ និងប្រធានាធិបតីកូរ៉េខាងត្បូង លោកមូន ចេអ៊ីន។
ក្រសួងការបរទេសកូរ៉េខាងជើង បានចោទប្រកាន់ប្រទេសសម្ព័ន្ធមិត្តទាំង២ថា “កំពុងលេងកលល្បិចទាំងអស់” ដើម្បីធ្វើឲ្យសមយុទ្ធយោធារបស់ពួកគេត្រឹមត្រូវ ហើយសញ្ជាតិពិតដ៏ក្រេវក្រោធរបស់ពួកគេ មិនអាចបិទបាំងបានឡើយ។
កូរ៉េខាងជើង បានត្រូវព្រនង់ដោយសារតែទណ្ឌកម្មសេដ្ឋកិច្ចរបស់សហរដ្ឋ និងអន្តរជាតិ ពាក់ព័ន្ធនឹងការអភិវឌ្ឍន៍កម្មវិធីអាវុធនុយក្លេអ៊ែរ និងការបាញ់សាកល្បងមីស៊ីលរបស់ទីក្រុងព្យុងយ៉ាង។
កាលពីថ្ងៃសុក្រសប្តាហ៍មុន កូរ៉េខាងជើង បានបាញ់មីស៊ីល ដែលក្រុមមន្ត្រីកូរ៉េខាងត្បូង អះអាងថា ជាប្រភេទថ្មីនៃមីស៊ីលរយៈចម្ងាយជិត។
យោងតាមការអះអាងរបស់អគ្គនាយសេនាធិការចម្រុះកូរ៉េខាងត្បូង(JCS) បានឲ្យដឹងថា មីស៊ីលទាំង២គ្រឿងនេះ បានធ្លាក់ចូលទៅក្នុងសមុទ្រជប៉ុន ដែលគេស្គាល់ថាជាសមុទ្រខាងកើត។
JCS បានអះអាងថា មីស៊ីលនេះបានហោះទាប និងបានធ្វើដំណើរចម្ងាយ២២០គ.ម ។ ក្រុមអ្នកវិភាគ បាននិយាយថា វាទំនងជាហោះលឿនខុសពីធម្មតា។
ដោយឡែក កាលពីថ្ងៃពុធ សប្តាហ៍មុន កូរ៉េខាងជើងបាញ់មីស៊ីល២គ្រាប់ទៀត ដែលហោះបានចម្ងាយ២៥០គ.ម និងបានហោះឡើងដល់រយៈកម្ពស់៣០គ.ម មុនពេលធ្លាក់ចូលទៅក្នុងសមុទ្រជប៉ុន។
នៅថ្ងៃទី២៥ ខែកក្កដា កូរ៉េខាងជើង បានបាញ់មីស៊ីល២គ្រឿងផ្សេងទៀត ដែលមីស៊ីល១គ្រឿងហោះបានចម្ងាយ៦៩០គ.ម មុនពេលវាធ្លាក់ចូលក្នុងសមុទ្រជប៉ុន៕