កាលពីថ្ងៃទី២ ខែសីហា មុននេះ លោក James Ma (ជែម ម៉ា)ដែលជាតារាសម្តែងដ៏ល្បីល្បាញមួយរូបរបស់ថៃ បានចូលរួមព្រឹត្តការណ៍មួយ និងបានផ្តល់បទសម្ភាសន៍ជាមួយក្រុមអ្នកសារព័ត៌មាន ពាក់ព័ន្ធនឹងពាក្យចចាមអារាមស្នេហារបស់លោកជាមួយនាង Pie Rinrada (ភី រិនរ៉ាដា)។
លោក James Ma បាននិយាយថា លោកបានសម្តែងរួមគ្នាជាមួយនាង Pie Rinrada នៅក្នុងរឿងភាគទូរទស្សន៍ ‘Chart Suer Pun Mungkorn’។ លោកស្គាល់នាងច្បាស់ ហើយនាងមានអ្នកគ្រប់គ្រងតែមួយដូចជារូបលោកដែរ។
តារាសម្តែងរូបនេះ បានអះអាងថា លោកជួបនាងក្នុងកម្រិតការងារសម្តែង ឬជួបគ្នាទទួលអាហារជាក្រុមជាមួយសិល្បះរៀមច្បង ឬជាមួយអ្នកគ្រប់គ្រងរបស់លោក។
លោក James Ma បានបញ្ជាក់ថា រវាងរូបលោក និងនាង Pie Rinrada គ្រាន់តែជាតួសម្តែងរៀមច្បង និងសិស្សប្អូនប៉ុណ្ណោះ។
លោកនិយាយថា សម្រាប់មួកដែលស្រដៀងគ្នានឹងមួកនាង Pie Rinrada គាត់ពាក់ថតរូប ពេលធ្វើដំណើរទៅកាន់អូស្ត្រាលី ជាមួយម្តាយរបស់លោក គឺគាត់បានទិញវារយៈពេលជាង១ឆ្នាំមកហើយ។ លោក James Maនិយាយថា វាមិនមែនជាមួកសម្រាប់គូស្នេហ៍នោះទេ៕