ការរញ្ជួយដីកម្រិត៥.៩រ៉ិចទ័រ បានអង្រួនកោះតៃវ៉ាន់ជាថ្មីម្តងទៀត នៅព្រឹកថ្ងៃព្រហស្បត្តិ៍នេះ ធ្វើឲ្យប្រជាជនស្ទើរទូទាំងកោះ ភ័យស្លន់ស្លោគ្រប់ៗគ្នា។
មន្ទីរវាស់ភូគព្ភសាស្ត្រសហរដ្ឋអាមេរិក បាននិយាយថា ការរញ្ជួយដីកម្រិត៥.៩រ៉ិចទ័រ បានអង្រួនកោះតៃវ៉ាន់ ធ្វើឲ្យកាត់ផ្តាច់ចរន្តអគ្គិសនី ថ្វីត្បិតតែនៅមិនទាន់មានសេចក្តីរាយការណ៍ភ្លាមៗពីគ្រោះថ្នាក់ក៏ដោយ ហើយការរញ្ជួយដីនេះដែរ កើតឡើងនៅវេលាម៉ោង៥.២៨នាទីព្រឹកក្នុងជម្រៅដី១០គ.ម ស្ថិតនៅស្រុកភាគឦសានយីឡាន។
ដោយឡែក មន្ទីរឧតុនិយមកណ្តាលតៃវ៉ាន់ បានអះអាងថា ការរញ្ជួយដីនេះមានកម្រិត៦រ៉ិចទ័រ។
អគារខ្ពស់ៗ បានយោលដូចទោងនៅក្នុងទីក្រុងតៃប៉ិ ធ្វើឲ្យមនុស្សម្នាភ្ញាក់ពីដំណេកគ្រប់ៗគ្នា និងព្យាយាមរត់គេចចេញពីអគារ។
ក្រុមអាជ្ញាធរ បាននិយាយថា ការរញ្ជូយដីនេះ បានធ្វើឲ្យមានភាពរំញ័រស្ទើរទូទាំងកោះ ធ្វើឲ្យកាត់ផ្តាច់ចរន្តអគ្គិសនីទៅកាន់ផ្ទះ១៣០០ខ្នងនៅក្នុងតំបន់ពិសេសនៃទីក្រុងតៃប៉ិ ខណៈដែលរដ្ឋបាលផ្លូវដែកតៃវ៉ាន់ បានផ្អាកសេវាកម្មមួយចំនួនរបស់ពួកគេនៅក្នុងស្រុកយីឡាន។
កោះតៃវ៉ាន់ស្ថិតនៅចំណុចប្រសព្វនៃផ្លាកតិចតូនិកចំនួន២ ហើយវាតែងតែទទួលរងដោយការរញ្ជួយដីជាញឹកញាប់។
គួរឲ្យដឹងថា កាលពីខែមេសាកន្លងទៅ ការរញ្ជូយដីកម្រិត៦.១រ៉ិចទ័រ បានអង្រួនកោះមួយនេះផងដែរ ធ្វើឲ្យអាក់ខានដល់ការធ្វើចរាចរណ៍ និងបានធ្វើឲ្យមនុស្ស១៧នាក់រងរបួសធ្ងន់ និងស្រាល។
ចំណែកឯកាលពីខែកុម្ភះ ឆ្នាំមុន ការរញ្ជួយដីកម្រិត៦.៤រ៉ិចទ័រ បានអង្រួនទីក្រុងហួលៀន មុនពេលពាក់កណ្តាលយប់ ដោយបានសម្លាប់មនុស្ស១៧នាក់។ ភាគច្រើននៃជនរងគ្រោះ បានជាប់ខ្លួនក្នុងអគាររលំ ។
សូមបញ្ជាក់ថា ការរញ្ជួយដីដ៏អាក្រក់បំផុតនៅតៃវ៉ាន់នារយៈពេលជាច្រើនទសវត្សរ៍កន្លងមកនេះ គឺការរញ្ជួយដីកម្រិត៧.៦រ៉ិចទ័រ កាលពីខែកញ្ញា ឆ្នាំ១៩៩៩ ដែលបានសម្លាប់មនុស្សប្រហែល២.៤០០នាក់៕
Home ព្រឹត្តិការណ៍ថ្មីៗ កោះតៃវ៉ាន់រងគ្រោះទៀតហើយដោយសាររញ្ជួយដីកម្រិត៥.៩រ៉ិចទ័រ ខណៈដែលអ្នកគ្រោះថ្នាក់មិនទាន់ដឹងភ្លាមៗ