យន្តហោះប្រតិកម្មជំនាន់ទី៥ Sukhoi Su-57 លើកដំបូងរបស់រុស្ស៊ី ចាប់ផ្តើមផលិតហើយ។ ក្រោមលក្ខខណ្ឌនៃកុងត្រាដែលបានចុះហត្ថលេខាកាលពីខែមិថុនា ឆ្នាំមុន ក្រុមហ៊ុន United Aircraft Corporation នឹងផលិតយន្តហោះ Su-57 ៧៦គ្រឿង ដែលយន្តហោះប្រតិកម្មលើកដំបូង នឹងដាក់ឲ្យប្រើប្រាស់នៅមុនដំណាច់ឆ្នាំ២០១៩នេះ។
ដោយបានបង្ហាញខ្លួនលើកដំបូងកាលពីឆ្នាំ២០១០ យន្តហោះ Su-57 បានដាក់ឈ្មោះរបស់វាតាមឈ្មោះមន្ទីររចនាម៉ូត Sukhoi ។ យន្តហោះ Su-57 កាលពីមុន មិនត្រូវបានគេដឹងពីការរចនាម៉ូតនោះទេ ហើយការបង្ហាញខ្លួនរបស់វា បានធ្វើឲ្យលោកខាងលិចមានការភ្ញាក់ផ្អើលយ៉ាងខ្លាំង។
យន្តហោះ Su-57 ត្រូវបានគេចាត់ទុកថាជាយន្តហោះប្រតិកម្មជំនាន់ទី៥ គឺជាលក្ខខណ្ឌមួយចង់សំដៅលើជំនាន់ទី៥នៃយន្តហោះក្រោយសង្គ្រាមលោកលើកទី២។ យន្តហោះមួយនេះ មានសមត្ថភាពអាចហោះក្នុងល្បឿនលឿនដូចជាយន្តហោះប្រតិកម្ម Mach 1 ឬលឿនជាងនេះ ហើយមានប្រព័ន្ធរ៉ាដាខ្លាំង និងសមត្ថភាពបញ្ជូន ឬទទួលទិន្នន័យបានយ៉ាងឆាប់រហ័ស។
ជាងនេះទៅទៀត យន្តហោះ Su-57 គឺជាយន្តហោះចម្បាំងដែលមានមុខងារច្រើនយ៉ាងទាំងសមត្ថភាពបច្ចេកវិទ្យា ដែលអាចប្រតិបត្តិការបានទាំងមុខងារបាញ់ពីលើអាកាសទៅលើអាកាស និងពីលើអាកាសមកលើដី។ វាមានបំពាក់មីស៊ីល Kinzhal ដែលក្រុមអ្នកជំនាញមានជំនឿថា មីស៊ីលនេះ គឺជាប្រភេទមីស៊ីលបាលីស្ទិករយៈចម្ងាយខ្លី 9K720 Iskander ដែលដាក់នៅក្រោមយន្តហោះ។ មីស៊ីល Kinzhal អាចហោះក្នុងល្បឿនលឿនជាងសម្លេងដល់ទៅ១០ដង ហើយវាអាចហោះបានចម្ងាយ១.២៤២ម៉ៃល៍។
ប៉ុន្តែភាពភ្ញាក់ផ្អើលដំបូងរបស់ពិភពលោកពីភាពអមតៈរបស់យន្តហោះ Su-57 ត្រូវបានស្ងប់ស្ងាត់ទៅវិញ ដោយសារតែការពន្យាពេលផលិតរបស់វា។ យន្តហោះនេះ កាលពីមុនត្រូវបានគេស្គាល់ឈ្មោះថា T-50ដែលបានហោះហើរលើកដំបូងកាលពីថ្ងៃទី២៩ ខែមករា ឆ្នាំ២០១០។
នៅឆ្នាំ២០១២ ប្រធានកងទ័ពអាកាសរុស្ស៊ី បានអះអាងថា ការផលិតយន្តហោះ នឹងចាប់ផ្តើមនៅឆ្នាំ២០១៥ ប៉ុន្តែចាប់តាំងពីពេលនោះ គេមិនដែលឃើញរុស្ស៊ីផលិតវានោះទេ។
ប្រទេសឥណ្ឌា គឺជាដៃគូដំបូងគេក្នុងកម្មវិធីនេះ ហើយនិងបានដកខ្លួនវិញ ក្រោយការពន្យាពេលម្តងជាពីរដងនោះ ។ ពួកគេ បានអះអាងថា ពួកគេចាយលុយច្រើនក្នុងកម្មវិធីនេះ តែបែរជារុស្ស៊ី បដិសេធន៍មិនចែករំលែកលេខកូដប្រភព Softwareទៅវិញ៕
