ប្រទេសហ្វីលីពីន បានប្រកាសការរីករាលដាលថ្នាក់ជាតិនៃជំងឺគ្រុនឈាម ក្រោយមនុស្សរាប់រយនាក់ បានបាត់បង់អាយុជីវិតរបស់ពួកគេក្នុងឆ្នាំនេះដោយសារតែជំងឺកើតចេញពីមូសខ្លា ។
លោក Francisco Duque គឺជារដ្ឋមន្ត្រីក្រសួងសុខាភិបាលហ្វីលីពីន បាននិយាយប្រាប់សន្និសីទកាសែតថា យ៉ាងហោចណាស់១៤៦.០៦២ករណី ត្រូវបានគេរកឃើញចាប់តាំងពីខែមករា រហូតដល់ថ្ងៃទី២០ ខែកក្កដា ពោលគឺកើនឡើ៩៨ភាគរយធៀបនឹងអំឡុងពេលតែមួយកាលពីឆ្នាំមុន។ មនុស្សសរុប៦២២នាក់ បានស្លាប់ដោយសារតែជំងឺគ្រុនឈាម ក្នុងឆ្នាំនេះ។
ការរីករាលដាលត្រូវបានប្រកាសឡើង ដើម្បីឲ្យក្រុមមន្ត្រី អាចកំណត់តំបន់ដែលត្រូវការយកចិត្តទុកដាក់បន្ទាន់។
ការឆ្លងជំងឺគ្រុនឈាមនេះ បណ្តាលឲ្យកើតជំងឺដូចជាគ្រុនផ្តាស្តាយ ប៉ុន្តែយូរៗទៅ វានឹងក្លាយជាជំងឺធ្ងន់ធ្ងរកាន់តែខ្លាំងឡើង។
យោងតាមការអះអាងពីអង្គការសុខភាពពិភពលោក(WHO)បានឲ្យដឹងថា ការកើតមានជំងឺគ្រុនឈាមទូទាំងពិភពលោក បានកើនឡើងគួរឲ្យកត់សំគាល់ក្នុងរយៈពេលជាច្រើនទសវត្សរ៍កន្លងមកនេះ។
ប្រទេសហ្វីលីពីន បានប្រកាសអាសន្នថ្នាក់ជាតិកាលពីដំបូងស្តីជំងឺគ្រុនឈាមកាលពីខែកក្កដាកន្លងទៅ។
ហ្វីលីពីន នៅតែប្រកាន់ភ្ជាប់យ៉ាងមុតមាំលើការបំរាមវ៉ាក់សាំងគ្រុនឈាមលើកដំបូងរបស់ពិភពលោក Dengvaxia ដែលត្រូវបានគេហាមប្រាម បន្ទាប់ពីការស្លាប់កុមារសិបនាក់ ក្នុងចំណោមមនុស្សជាង៧០ម៉ឺននាក់ ទទួលការចាក់វ៉ាក់សាំងមួយនេះ កាលពីឆ្នាំ២០១៦ និងឆ្នាំ២០១៧ នៅក្នុងយុទ្ធនាការចាក់ថ្នាំបង្ការរបស់រដ្ឋាភិបាល។
លោក Duque បាននិយាយថា រដ្ឋាភិបាលកំពុងតែសិក្សាលើការទាមទារអនុញ្ញាតឲ្យក្រុមហ៊ុនឱសថបារាំង Sanofi ចែកចាយវ៉ាក់សាំងមួយនេះមកកាន់ទីផ្សារហ្វីលីពីនឡើងវិញ ប៉ុន្តែលោកបានធ្វើការច្រានចោលថានឹងមិនប្រើប្រាស់ថ្នាំមួយនេះ ដើម្បីប្រយុទ្ធប្រឆាំងនឹងការរីករាលកំពុងកើតឡើងនោះទេ។
លោក Duque បានបញ្ជាក់ថា វ៉ាក់សាំងមួយនេះ មិនបានលើកឡើងពីកុមារងាយនឹងរងគ្រោះថ្នាក់បំផុតនោះទេ ដែលមានអាយុចាប់ពី៥ឆ្នាំដល់៩ឆ្នាំ។
សូមបញ្ជាក់ថា វ៉ាក់សាំង Dengvaxia ដែលបច្ចុប្បន្នមានលិខិតអនុញ្ញាតនៅតាមបណ្តាប្រទេសចំនួន២០ដោយផ្អែកលើអង្គការសុខភាពពិភពលោកនោះ ត្រូវបានគេឯកភាពឲ្យប្រើប្រាស់សម្រាប់តែមនុស្សមានអាយុ៩ឆ្នាំ និងលើសពីនេះប៉ុណ្ណោះ៕
