កូរ៉េខាងជើង បានបញ្ចេញរូបថតជាច្រើនសន្លឹកដែលមេដឹកនាំគីម ជុងអ៊ុន អង្កេតមើលនាវាមុជទឹកប្រភេទថ្មីរបស់ពួកគេ។
រូបភាពទាំងនេះ ឃើញមេដឹកនាំកូរ៉េខាងជើងរូបនេះ ធ្វើដំណើរទៅកាន់រោងចក្រផលិតនាវាដ៏ធំមួយ ជាកន្លែងដែលនាវាមុជទឹកកំពុងតែសាងសង់។
ក្រុមអ្នកជំនាញមានជំនឿថា នាវាមុជទឹកប្រភេទថ្មីនេះ នឹងផ្ទុកមីស៊ីលបំពាក់ក្បាលគ្រាប់នុយក្លេអ៊ែរ ដែលអាចប្រើប្រាស់ដើម្បីគំរាមកំហែងមកលើមូលដ្ឋានយោធាសហរដ្ឋអាមេរិក នៅជប៉ុន និងទូទាំងតំបន់អាស៊ី-បាស៊ីហ្វិក។
រូបភាពដែលចេញផ្សាយដោយទីភ្នាក់ងារព័ត៌មានរដ្ឋ KCNAឃើញលោកគីម និងបរិវាររបស់លោក ធ្វើដំណើរទៅមើលនាវាមុជទឹកនៅក្នុងអគាររោងចក្រដ៏ធំមួយកន្លែង។
នាវាមុជទឹកថ្មីនេះ មានលក្ខណៈស្រដៀងគ្នានឹងនាវាមុជទឹកដែលមានស្រាប់របស់កូរ៉េខាងជើង ប៉ុន្តែវាទំនងជាមានក្តោងធំជាងមុនជាមួយនឹងប្រព័ន្ធបាញ់មីស៊ីបាលីស្ទិក Pukgeukseong-1 ។
ទីភ្នាក់ងារ KCNAបានរាយការណ៍ថា លោកគីម ជុងអ៊ុន បានទៅមើលនាវាមុជទឹកទើបបង្កើតថ្មី ហើយនិងបានលំអិតពីមុខងារតាក់ទិកប្រតិបត្តិការរបស់នាវា និងប្រព័ន្ធប្រយុទ្ធអាវុធ។
លោកគីម បានបង្ហាញនូវការពេញចិត្តជាខ្លាំងចំពោះការរចនា និងការសាងសង់នាវាមុជទឹកនេះ ដើម្បីបំពេញបំណងប្រាថ្នាយុទ្ធសាស្ត្រយោធារបស់គណបក្សរបស់លោក ឲ្យសមគ្រប់ស្ថានភាព ។
នាវាមុជនេះ នឹងចេញប្រតិបត្តិការនៅក្នុងសមុទ្រជប៉ុន។
សូមបញ្ជាក់ថា នាវាមុជទឹក Project 633 របស់អតីតសហភាពសូវៀតដើរដោយថាមពលប្រេងម៉ាស៊ូត ដែលត្រូវបានកងកម្លាំងអង្គការ NATOឲ្យរហ័សនាមថា “Romeo” ត្រូវបានដាក់ឲ្យប្រើប្រាស់កាលពីចុងទសវត្សរ៍ឆ្នាំ១៩៥០។
អតីតសហភាពសូវៀត បានចែករំលែកគម្រោងនាវាមុជទឹកជាមួយចិន ដែលបានបញ្ជូននាវាមុជទឹក៧គ្រឿងទៅឲ្យកូរ៉េខាងជើងនៅក្នុងទសវត្សរ៍ឆ្នាំ១៩៧០ ហើយនិងបានផ្គត់ផ្គង់គ្រឿងបន្លាស់សម្រាប់នាវាមុជទឹក១៣គ្រឿងបន្ថែមទៀត។
មកទល់នឹងឆ្នាំ២០១៩នេះ នាវាមុជទឹក Romeos បានរួមចំណែកដ៏ធំនៅក្នុងកងម៉ារីនកូរ៉េខាងជើង ។ កាលពីឆ្នាំ២០១៤ លោកគីម ជុងអ៊ុន បានឡើងជិះលើនាវាមុជទឹកមួយគ្រឿងក្នុងចំណោមនាវាមុជទឹកជាច្រើនគ្រឿងទៀតរបស់កូរ៉េខាងជើង៕
Home ព្រឹត្តិការណ៍ថ្មីៗ កូរ៉េខាងជើងផលិតនាវាមុជទឹកប្រភេទថ្មីដែលអាចផ្ទុកមីស៊ីលបំពាក់ក្បាលគ្រាប់នុយក្លេអ៊ែរ