ក្រុមអ្នកវិទ្យាសាស្ត្រអ៊ីស្រាអែល នៅឯសាកលវិទ្យាល័យ Tel Aviv បានអភិវឌ្ឍន៍វ៉ាក់សាំងណាណូថ្មី សម្រាប់ព្យាបាលមហារីកគ្រាប់ឈាម ដែលជាជំងឺមហារីកស្បែកម្យ៉ាងដ៏សាហាវបំផុត។
វិធីសាស្ត្រព្យាបាលរបស់ពួកគេ មកទល់នឹងពេលនេះមានប្រសិទ្ធិភាពខ្ពស់ក្នុងការការពារការអភិវឌ្ឍន៍របស់មហារីកគ្រាប់ឈាម ហើយនិងក្នុងការព្យាបាលមហារីកគ្រាប់ឈាមដំបូង និងការរីកដាលនៃមហារីកបង្កឡើងដោយសារតែជំងឺមហារីកគ្រាប់ឈាម។
ការយកចិត្តទុកដាក់សំខាន់លើការស្រាវជ្រាវនេះ គឺផ្តោតលើភាគល្អិតណូណាដែលដើរតួយ៉ាងសំខាន់សម្រាប់វ៉ាក់សាំង។
ការសិក្សាស្រាវជ្រាវនេះ ដឹកនាំដោយសាស្ត្រារ្យ Ronit Satchi-Fainaro គឺជាប្រធាននាយកដ្ឋានសរីរវិទ្យា និងឱសថសាស្ត្រ និងជាប្រធានមន្ទីរពិសោធន៍សម្រាប់ស្រាវជ្រាវជំងឺមហារីក និងថ្នាំពេទ្យណាណូ នៃមហាវិទ្យាល័យឱសថ TAU ហើយនិងសាស្ត្រាចារ្យ Helena Florindo មកពីសាកលវិទ្យាល័យ Lisbon រួមជាមួយនឹងក្រុមអ្នកវិទ្យាសាស្ត្រជាច្រើនរូបទៀត។
មហារីកគ្រាប់ឈាម នឹងអភិវឌ្ឍន៍នៅក្នុងកោសិការស្បែកដែលផលិតបានជាដុំគ្រាប់ឈាម ឬជាតិពណ៌ស្បែក។
លោក Satchi-Fainaro គឺជាសាស្ត្រាចារ្យមកពីមហាវិទ្យាល័យ TAU បាននិយាយថា “សង្គ្រាមប្រឆាំងនឹងជំងឺមហារីក បានក្លាយជារឿងធម្មតាទៅហើយៗជំងឺមហារីកគ្រាប់ឈាម បានរីកលូតលាស់គួរឲ្យកត់សំគាល់ ក្នុងរយៈពេលជាច្រើនឆ្នាំកន្លងមកនេះ តាយរយៈការព្យាបាល ជាពិសេសគឺការព្យាបាលតាមការចាក់សារធាតុគីមី វិទ្យុសកម្ម និងការព្យាបាលដោយប្រើភាពស៊ាំ ខណៈពេលដែលវិធីប្រើវ៉ាក់សាំង ប្រឆាំងនឹងជំងឺមហារីក នៅមិនទាន់មានប្រសិទ្ធិភាពនោះ។
លោកបន្តថា នៅក្នុងការសិក្សារបស់ពួកយើង យើងបានបង្ហាញជាលើកដំបូងថាវាអាចទៅរួចក្នុងការបង្កើតវ៉ាក់សាំងណាណូដ៏មានប្រសិទ្ធិភាពប្រឆាំងនឹងជំងឺមហារីកគ្រាប់ឈាម ហើយនិងរំញោចប្រព័ន្ធភាពស៊ាំ ដល់ការព្យាបាលដោយប្រើភាពស៊ាំ។
ក្រុមអ្នកវិទ្យាសាស្ត្រ បានប្រើភាគដ៏តូចមួយទំហំប្រហែល១៧០ណាណូម៉ែត្រ ធ្វើពីប៉ូលីមែរដែលអាចបំបែកបាន។ នៅក្នុងភាគល្អិននិមួយៗ ពួកគេខ្ចប់ច្រវ៉ាក់ខ្លីអាស៊ីតអាមីណូចំនួន២ដែលមាននៅក្នុងមហារីកគ្រាប់ឈាម។ បន្ទាប់មក ពួកគេក៏ចាក់ភាគល្អិតណាណូ(វ៉ាក់សាំងណាណូ) ចូលទៅក្នុងកណ្តុរគំរូ ដែលកើតជំងឺមហារីកគ្រាប់ឈាម។ ជាលទ្ធផល ពួកគេទទួលបានប្រសិទ្ធិភាពជាទីគាប់ចិត្ត៕
