កងទ័ពជើងទឹកសហរដ្ឋអាមេរិក បានស្នើសុំឲ្យឧស្សាហកម្មផលិតនាវា បង្ហាញទស្សនៈ សម្រាប់ការផលិតនាវាយន្ត ដែលជាប្រភេទនាវាគ្មានមនុស្សបើក Large Unmanned Surface Vehicle (LUSV)ធំបំផុតនៅលើពិភពលោក នៅក្នុងឆ្នាំ២០២០ខាងមុខនេះ។
កងទ័ពជើងទឹកអាមេរិកចង់បាននាវាយន្ត LUSV១០គ្រឿង ក្នុងរយៈពេល៥ឆ្នាំ។
នាវាទាំងនេះនឹងមានមុខងារជាគេញសម្ងាត់សម្រាប់កងនាវាចម្បាំងអាមេរិក ផ្ទុកដោយរ៉ាដាដ៏ស្មុគស្មាញ ឧបករណ៍ចាប់រលកសញ្ញាក្នុងទឹក និងឡតកាំភ្លើងអណ្តែត ដែលបំពាក់ដោយមីស៊ីលរយៈចម្ងាយមធ្យម និងមីស៊ីលប្រឆាំងដែនអាកាស។
លើលពីនេះទៅទៀត នាវាយន្តប្រភេទនេះ នឹងមានមុខងារច្រើនយ៉ាង ដែលគូសត្រូវ នឹងចាត់ទុកថាជាវាជានាវាដ៏គ្រោះថ្នាក់បំផុត។
សំណើរពង្រាងដែលបានបង្ហោះលើវែបសាយ FedBizOpps បានបញ្ជាក់ថា នាវាយន្ត LUSV ប្រើប្រាស់ក្បាលគ្រាប់ជាច្រើនប្រភេទ សម្រាប់បេសកកម្មគ្មានមនុស្សបើក ដើម្បីបន្ថែមពីលើកងកម្លាំងជួរមុខរបស់កងទ័ពជើងទឹក។
ដោយមានសមត្ថភាពបំពាក់ក្បាលគ្រាប់ធំៗបែបនេះ នាវា LUSV ត្រូវបានរចនាឡើងដើម្បីចុះប្រតិបត្តិការធ្វើសង្គ្រាមគ្រប់កាលះទេសះដោយឯករាជ្យ ។
នាវាយន្ត LUSV នេះដែរ នឹងមានសមត្ថភាពចុះប្រតិបត្តិការស្វយ័ត ឬពាក់កណ្តាលស្វយ័ត ដោយប្រើប្រាស់ប្រតិបត្តិករ(ឧបករណ៍បញ្ជាពីចម្ងាយ)។
មន្ត្រីមកពីកម្មវិធីស្រាវជ្រាវ និងអភិវឌ្ឍន៍ បាននិយាយប្រាប់កាសែត USNI News កាលពីដើមឆ្នាំនេះថា កងទ័ពជើងទឹក បានស្នើសុំថវិកាជាតិ៤០០លានដុល្លារ ដើម្បីផលិតនាវា LUSV ដែលមានបណ្តោយចាប់ពី៦១ម៉ែត្រ ដល់៩១ម៉ែត្រ និងអាចផ្ទុកចំណុះបាន២ពាន់តោន។ កងទ័ពជើងទឹកមានគម្រោងផលិតនាវា២គ្រឿងក្នុងរយៈពែល១ឆ្នាំ ពោលគឺផលិតឲ្យបាន៥គ្រឿង ក្នុងរយៈពេល៥ឆ្នាំ។
បើសិនជាផលិតបានពិតមែន នាវា LUSV នឹងក្លាយជានាវាគ្មានមនុស្សបើកធំបំផុតរបស់ពិភពលោក គិតមកទល់នឹងពេលនេះ ។ នាវាមួយគ្រឿងនេះ នឹងមានកន្លែងសម្រាកផងដែរសម្រាប់នាវិក២-៣នាក់ បើសិនជាចាំបាច់។
តាមធម្មតានាវាគ្មានមនុស្សបើក គ្មានបំពាក់អាវុធនោះទេ ប៉ុន្តែវាមានសមត្ថភាពផ្ទុកមីស៊ីលប្រឆាំងនឹងនាវា និងមីស៊ីលរយៈចម្ងាយធម្យម។
នាវា LUSVនឹងមានសមត្ថភាពផងដែរក្នុងការដើរតួរជាគេញសម្ងាត់ បើកមុខឲ្យនាវាចម្បាំង ដើម្បីការពារការគំរាមកំហែងណាមួយឲ្យបានមុន៕
