កងទ័ពសហរដ្ឋអាមេរិក កំពុងតែផលិតក្បាលគ្រាប់កាំភ្លើងធំ ដែលមានសមត្ថភាពបាញ់ប្រហារមកលើគោលដៅគូសត្រូវដែលកំពុងបើកបរ ឬមិនស្គាល់ទីតាំង ដែលរួមទាំងរថក្រោះ និងរថពាសដែក ។
ក្បាលគ្រាប់នេះ មានឈ្មោះថា “C-DAEM” ដែលត្រូវបានរចនាឡើងដើម្បីជំនួសក្បាលគ្រាប់ចាស់ៗ ដែលមិនផ្ទុះនៅលើសមរភូមិប្រយុទ្ធ និងបង្កការកំរាមកំហែងដល់ជនស៊ីវិល។
ក្បាលគ្រាប់នេះ ត្រូវបានរចនាឡើងផងដែរ ដើម្បីវាយប្រហារមកលើគោលដៅ ទោះបីជាក្នុងស្ថានភាពដែលប្រព័ន្ធ GPSជាប់គាំង ឬមិនដឹងច្បាស់ពីទីតាំងរបស់គូសត្រូវក៏ដោយ។
កាលពីអំឡុងទសវត្សរ៍ឆ្នាំ១៩៨០ គោលបំណងព្រួយ១បាញ់បានសត្វ២របស់កងទ័ពអាមេរិក បានធ្វើឲ្យគ្រាប់កាំភ្លើងធំ “DPICM”ល្អប្រសើរឡើង។ គ្រាប់កាំភ្លើងធំ DPICM ត្រូវបានគេរចនាឡើង ដើម្បីបាញ់ស្រោចនៅលើសមរភូមិប្រយុទ្ធ ដោយសារតែក្នុងក្បាលគ្រាប់នេះ នៅមានគ្រាប់បែកតូចៗប៉ុនកូនបាល់តឺន្នីស ហើយវាត្រូវបានប្រើប្រាស់សម្រាប់ការវាយប្រហារមកលើគោលដៅទ្រង់ទ្រាយធំ។
ក្បាលគ្រាប់កាំភ្លើងធំមួយនេះ មានសារៈសំខាន់ក្នុងការការពារទាហានថ្មើរជើង ហើយវាមានសមត្ថភាពបំផ្លាញ ផ្លូវ អាវុធ ឬសេនស័រ របស់រថយន្តក្រោះ ឬរថពាសដែក។
ទោះបីជាយ៉ាងណាក៏ដោយ ក្បាលគ្រាប់កាំភ្លើង C-DAEM គឺជាការអភិវឌ្ឍន៍មួយនៃគ្រាប់កាំភ្លើងធំកាណុងទំហំ១៥៥មីលីម៉ែត្រ Excalibur របស់កងទ័ពអាមេរិក។ Excalibur គឺជាគ្រាប់កាំភ្លើងធំដឹកនាំដោយប្រព័ន្ធ GPS មានសមត្ថភាពវាយប្រហារចំគោលដៅនៅចម្ងាយរាប់សិបម៉ៃល៍ ។
ក្រុមហ៊ុន Raytheon ដែលផលិតគ្រាប់កាំភ្លើងធំ Excalibur បានអះអាងថា វាអាចធ្លាក់នៅចម្ងាយ៦ហ្វ៊ូតកន្លះប៉ុណ្ណោះពីគោលដៅបាញ់ ពោលគឺស្ថិតក្នុងទីតាំងមួយដែលអាចបំផ្លាញរថពាសដែកឬរថក្រោះ បានទាំងស្រុង។
ប៉ុន្តែសម្រាប់ក្បាលគ្រាប់ C-DAEM វិញ វាមានសមត្ថភាពិសេសបំផុត ដែលអាចវាយប្រហារចំគោលដៅរថក្រោះ ឬរថពាសដែកផ្សេងទៀត ដែលកំពុងបើកបរ ដែលជាអ្វីមួយដែលក្បាលគ្រាប់កាំភ្លើងធំមានស្រាប់បច្ចុប្បន្ន មិនអាចធ្វើបាន។
ជាងនេះទៅទៀត ក្បាលគ្រាប់កាំភ្លើងធំថ្មីនេះ អាចវាយប្រហារចំគោលដៅមកលើរថយន្តយោធា ពេលដែលទីតាំងរបស់វាមិនត្រូវបានដឹងច្បាស់ថែមទៀតផង។ គ្រាប់កាំភ្លើង C-DAEM អាចបាញ់បានចម្ងាយ៦០គ.ម ដោយប្រើពេលត្រឹមតែជាង១នាទីប៉ុណ្ណោះ នឹងដល់គោលដៅភ្លាម ហើយវាអាចស្វែងករកគោលរបស់វានៅលើផ្ទៃដីជាង២៨គ.មក្រឡា៕
