បញ្ហាភ្លើងឆេះព្រៃនៅតំបន់ព្រៃអាម៉ាហ្សូន នៅពេលនេះមិនត្រឹមតែជាបញ្ហាវិបត្តិសកលប៉ុណ្ណោះ ទេ តែវាបានក្លាយជាវិបត្តិនយោបាយផងដែរ ក្រោយពេលដែលរដ្ឋាភិបាលប្រេស៊ីលចិត្តសឿង បន្ទាប់ពីពួកគេមិនខ្ចីមើលការផ្តល់ជូនជំនួយពីបណ្តាប្រទេសសេដ្ឋកិច្ច G7 ដើម្បីជួយដោះស្រាយបញ្ហាភ្លើងឆេះព្រៃទ្រង់ទ្រាយធំជាប់កណត់ត្រាពិភពលោកមួយនេះនោះ។
ប្រធានាធិបតីបារាំង លោកអេម៉ានូអែល ម៉ាក្រុង ជាប្រធានកិច្ចប្រជុំកំពូល G7 ដែលបានបញ្ចប់ទៅកាលពីថ្ងៃចន្ទ បាននិយាយថា ជំនួយ២២លានដុល្លារ នឹងត្រូវបញ្ចេញសម្រាប់ភ្លើងឆេះព្រៃនៅតំបន់ព្រៃអាម៉ាហ្សូន។
ទោះបីជាយ៉ាងណាក៏ដោយ ក្រុមមន្ត្រីប្រេស៊ីល គ្មានហេតុផលណាមួយ ត្រូវច្រានចោលលុយទាំងនេះទេ ប៉ុន្តែប្រធានាធបិតីប្រេស៊ីល លោកជែ បូលសូណារ៉ូ បានចោទប្រកាន់បារាំង ថាបានធ្វើមកលើប្រេស៊ីល ដូចជាអាណានិគមរបស់ខ្លួន។
រដ្ឋមន្ត្រីការពារជាតិប្រេស៊ីល លោកហ្វ៊ឺណាន់ដូ អាហ្សេវ៉េដូ អេ ស៊ីលវ៉ា បាននិយាយថា ភ្លើងឆេះព្រៃនៅតំបន់ព្រៃអាម៉ាហ្សូន លែងអាចគ្រប់គ្រងបានទៀតហើយ។
លោកហ្វ៊ឺណាន់ដូ បាននិយាយថា ទាហាន៤៤.០០០នាក់ ត្រូវបានដាក់ពង្រាយ ដើម្បីទប់ទល់ជាមួយភ្លើងឆេះព្រៃ និងឧក្រិដ្ឋកម្មបរិស្ថាន នៅតំបន់ព្រៃអាម៉ាហ្សូន។
ការផ្តល់សេចក្តីអធិប្បាយចំពោះការផ្តល់ជំនួយរបស់បណ្តាលប្រទេសរីកចម្រើន G7នាយអគ្គសេនាធិការបស់លោកបូលសូណារ៉ូ លោក អូនីក ឡូរ៉េនហ្សូនី បាននិយាយប្រាប់វែបសាយ Globo News ថា “អរគុណ ប៉ុន្តែធនធានទាំងនេះ ទាក់ទងជាងនឹងការកាប់ឆ្ការព្រៃឈើនៅអឺរ៉ុប”។
លោកឡូរ៉េនហ្សូនី ដែលចង់សំដៅលើអគ្គីភ័យឆាបឆេះព្រះវិហារ Notre-Dame ស្ថិតនៅក្នុងទីក្រុងប៉ារីស កាលពីខែមេសាកន្លងទៅនោះ បានបន្តថា លោកម៉ាក្រុង មិនអាចទាំងបញ្ចៀសផុតអគ្គីភ័យដែលអាចព្យាករណ៍បាននៅក្នុងព្រះវិហារដែលជាផ្នែកមួយនៃកេរតំណែលពិភពលោកផង ហើយលោកបែរជាចង់មកផ្តល់មេរៀនដល់ប្រទេសពួកយើងទៅកើតបែបនេះ?
លោកបានបញ្ជាក់ទៀតថា ប្រេស៊ីល អាចបង្រៀនប្រទេសណាមួយពីវិធីការពារព្រៃខ្លួនឯងបាន។
ភ្លើងឆេះព្រៃដ៏ច្រើនសន្ធឹកសន្ធាប់ជាប់កំណត់ត្រាពិភពលោក កំពុងកើតឡើងនៅក្នុងប្រទេសប្រេស៊ីល ដែលភាគច្រើននៅក្នុងតំបន់ព្រៃអាម៉ាហ្សូន។ កាលពីសប្តាហ៍មុន លោកម៉ាក្រុង បាននិយាយថា ភ្លើងឆេះព្រៃនៅតំបន់ព្រៃអាម៉ាហ្សូន គឺជា “វិបត្តិសកលលោក”។
ក្រុមអ្នករិះគន់បានចោទប្រកាន់លោកមូលសូណារ៉ូ ថាបានកាប់ឆ្ការព្រៃឈើដ៏អាក្រក់បំផុតនៅក្នុងតំបន់ព្រៃអាម៉ាហ្សូន។
ប្រាក់ជំនួយ២២លានដុល្លារ ត្រូវបានប្រកាសកាលពីថ្ងៃចន្ទ ពេលដែលមេដឹកនាំបណ្តាប្រទេសសេដ្ឋកិច្ច G7 ដែលរួមមានកាណដា បារាំង អាល្លឺម៉ង់ អ៊ីតាលី ចក្រភពអង់គ្លេស និងសហរដ្ឋអាមេរិក បានបន្តជួបគ្នានៅទីក្រុងប៊ីយ៉ារីត ប្រទេសបារាំង។
លោកម៉ាក្រុង បាននិយាយថា លុយនឹងអាចប្រគល់ជូនភ្លាមៗ សម្រាប់ចំណាយលើយន្តហោះពន្លត់អគ្គីភ័យបន្ថែមទៀត ហើយបារាំងនឹងផ្តល់ការគាំទ្រយ៉ាងពេញទំហឹងជាមួយយោធានៅក្នុងតំបន់នោះ។
ប៉ុន្តែលោក បូលសូណារ៉ូ ដែលបានចូលរួមជម្លោះជាសាធារណៈជាមួយលោកម៉ាក្រុង នារយៈពេលប៉ុន្មានសប្តាហ៍ចុងក្រោយនេះ បានចោទប្រកាន់មេដឹកនាំបារាំងរូបនេះ ថាបានបើកការវាយប្រហារដោយគ្មានហេតុផល និងមិនប្រកបដោយសុភវិនិច្ច័យ ប្រឆាំងនឹងតំបន់ព្រៃអាម៉ាហ្សូន ហើយនិងលាក់បាំងបំណងរបស់លោកពីក្រោយគំនិតរបស់ប្រទេសសម្ព័ន្ធមិត្ត G7។
ថ្វីត្បិតតែមានអនុសាសន៍បែបនេះពីលោកបូលសូណារ៉ូ ក៏ដោយ ក៏រដ្ឋមន្ត្រីបរិស្ថានប្រេស៊ីល គឺលោក រីឆាដូ សាឡេស បាននិយាយប្រាប់ក្រុមអ្នកសារព័ត៌មានថា មូលនិធិនេះ នឹងស្វាគមន៍ជានិច្ច៕
