យន្តហោះអវកាស X-37B របស់យោធាសហរដ្ឋអាមេរិក បានចំណាយពេល៧១៧ថ្ងៃនៅលើទីអវកាសដោយមិនបានឈប់ចូលចតលើផែនដីនោះឡើយ។
យន្តហោះអវកាសដែលដើរដោយថាពលពន្លឺព្រះអាទិត្យនេះ មានរាងរៅស្រដៀងគ្នានឹងយានអវកាសរបស់អង្គការ NASAដែរនេះ ហើយកាលពីដំបូងឡើយ វាត្រូវបាន រចនាឡើងដើម្បីជួសជុលផ្កាយរណប មុនពេលដែលអង្គការ NASAបញ្ឈប់គម្រោង ហើយវាក៏ត្រូវបានបញ្ជូនមកកាន់ក្រសួងការពារជាតិអាមេរិកវិញនៅក្នុងឆ្នាំ២០០៤។
បច្ចុប្បន្ន ពិភពលោកមិនបានដឹងច្បាស់ពីគោលបំណងពិតប្រាកដរបស់យន្តហោះអវកាសនេះឡើយ ដោយពិភពលោក គ្រាន់តែដឹងថា យន្តហោះអវកាស X-37B មានសមត្ថភាពចំណាយពេលរាប់ឆ្នាំនៅលើគន្លងតារាវិថី អំឡុងបេសកកម្មតែម្តងដោយមិនចាំបាច់វិលត្រឡប់មកកាន់ផែនដីវិញនោះឡើយ។
យន្តហោះមួយនេះ បានចាប់ផ្តើមចេញដំណើរកាលពីរយៈពេលជិត២ឆ្នាំមុន នៅថ្ងៃទី៧ ខែកក្កដា ឆ្នាំ២០១៧ ហើយវាបានបំបែកកំណត់ត្រាលើកមុន សម្រាប់ការគោចរណ៍លើតារាវិថីយូរបំផុត អំឡុងបេសកកម្មតែម្តងគត់ ដោយប្រើពេល៧១៧ថ្ងៃ ២០ម៉ោង និង៤២នាទី។
ទោះបីជាយ៉ាងណាក៏ដោយ គោលបំណងពិតប្រាកដនៃការគោចរណ៍នៅលើទីអវកាសរបស់យន្តហោះ នេះ បន្តស្ថិតនៅក្នុងភាពអាថ៌កំបាំងដដែល។
ប៉ុន្តែកងទ័ពអាកាសសហរដ្ឋអាមេរិក បានសរសេរពីយន្តហោះអវកាសនេះថា “គោលបំណងសំខាន់របស់យន្តហោះ X-37B មាន២ គឺទី១ បច្ចេកវិទ្យាយានអវកាសដែលអាចប្រើប្រាស់ឡើងវិញសម្រាប់អនាគតអាមេរិកនៅទីអវកាស និងទី២ ប្រតិបត្តិការការពិសោធន៍ ដែលអាចពិនិត្យ និងបញ្ជូនមកកាន់ផែនដីវិញ”។
បច្ចេកវិទ្យាជាច្រើន បាននឹងកំពុងធ្វើតេស្តនៅក្នុងកម្មវិធីមួយនេះ ដែលរួមមាន ប្រព័ន្ធការពារកម្តៅ ការគ្រប់គ្រងនាវាចរណ៍ ប្រព័ន្ធអគ្គិសនីនៅលើយានអវកាស រចនាសម្ព័ន្ធសីតុណ្ហភាពខ្ពស់ អ៊ីសូឡង់អាចប្រើឡើងវិញបាន ប្រព័ន្ធហោះហើរអេឡិចត្រូនិចស្រាល ប្រព័ន្ធរុញកម្រិតខ្ពស់ ការហោះហើរតាមគន្លងដោយស្វ័យប្រវត្តិ ការតម្រង់គោលដៅ ហើយនិងការចូលចត ជាដើម៕
