ពិតជាគួរឲ្យរន្ធត់យ៉ាង កាលពីពេលថ្មីៗនេះតារាចម្រៀងប្រចាំផលិតកម្មថោន បានបង្ហោះរៀបរាប់អំពីសកម្មភាពចោរ ៥ នាក់ស្ទាក់ប្លន់នៅយប់ស្ងាត់ តែលោកមិនព្រមឈប់ឡាន រហូតក្រុមចោរយកដុំថ្ម គប់បំបែកកញ្ចក់រថយន្តគួរឱ្យរន្ធត់ ។
ដោយយោងតាមគណនីហ្វេសបុកផ្លូវការរបស់តារាចម្រៀងក្នុងផលិតកម្ម ថោន លោក ករុណ ពេជ្រ បានរៀបរាប់ឲ្យដឹងថា «ថ្ងៃនេះ ខ្ញុំបាទសូមចែករំលែកព័ត៌មាន ដែលជនឆ្លៀតឱកាស គប់កញ្ចក់ឡានរបស់ខ្ញុំ ដើម្បីធ្វើសកម្មភាពនានា ពេលដែលមកដល់កន្លែងស្ងាត់ពេលយប់។ ដូច្នេះពេលយប់ស្ងាត់ សូមបងប្អូនប្រុងប្រយ័ត្នឲ្យបានល្អ ព្រោះគ្រប់កាលៈទេសៈ គ្រប់ទីកន្លែង និងគ្រប់បណ្តាប្រទេសទាំងអស់លើពិភពលោក តែងតែមានជនមួយចំនួនតូចតែងតែឆ្លៀតឱកាស ពេលដែលយើងគ្រប់គ្នាខ្វះការប្រុងប្រយ័ត្ន និងនឹកស្មានមិនដល់»។
តារាចម្រៀងរូបនេះបន្តថា «នេះពិតជាសំណាងធំរបស់ខ្ញុំហើយ ដែលជនឆ្លៀតឱកាសមានគ្នា៥នាក់ ស្ទាក់ឡានខ្ញុំឲ្យឈប់ ដល់ខ្ញុំអត់ឈប់ ពួកគេក៏គប់ឡានខ្ញុំតែម្តង ប៉ុន្តែខ្ញុំមិនឈប់នៅបន្តបើកទៅមុខរហូត ហើយក៏សំណាងដែរ មិនចំកន្លែងខ្ញុំបើក ហើយត្រូវតែកញ្ចក់ចំហៀងខាងក្រោយតៃកុង ប្រសិនចំតួឡានវិញ គឺរឹតតែចប់ហ្មង សរុបមកចុងក្រោយដូរកញ្ចក់អស់១០០ដុល្លារ ប៉ុន្តែព្រលឹងហោះទៅស៊ីព្រលិតបាត់ហើយ»។
