កាលពីពេលថ្មីៗនេះ តារា K-POP មួយរូបដែលជាអតីតសមាជិកនៃក្រុមចម្រៀងល្បី Kara ត្រូវបានប៉ូលិសកូរ៉េខាងត្បូងរកឃើញ ដេកស្លាប់នៅក្នុងផ្ទះរបស់នាងនៅថ្ងៃអាទិត្យនេះ ។ នេះបើតាមការចេញផ្សាយនៅមុននេះបន្តិចដោយសារព័ត៌មាន CNA នាយប់ថ្ងៃអាទិត្យ ទី២៤ ខែវិច្ឆិកា ឆ្នាំ២០១៩។
បើយោងតាមរបាយការណ៍ប៉ូលិសបានជួបសាក្សី ម្នាក់បានឃើញតារាស្រីអាយុ ២៨ ឆ្នាំរូបនេះស្លាប់នៅផ្ទះរបស់នាងនៅភាគខាងត្បូងទីក្រុងសេអ៊ូល ហើយបានរាយការណ៍ទៅអាជ្ញាធរ។
មូលហេតុនៃការស្លាប់នៅមិនទាន់ដឹងទេ។ ប៉ូលិសបានបដិសេធមិនផ្តល់ព័ត៌មានលម្អិតបន្ថែមទៀតនោះទេ។
នាងហារ៉ា បានបង្ហាញខ្លួនជាលើកដំបូងក្នុងឆ្នាំ ២០០៨ ក្នុងនាមជាសមាជិកក្រុមចម្រៀងស្រី Kara ដែលទទួលបានការគាំទ្រច្រើននៅក្នុងប្រទេសកូរ៉េខាងត្បូងជប៉ុននិងប្រទេសអាស៊ីដទៃទៀត។
ក្រោយមក នាងបានធ្វើការជាអ្នកចម្រៀងទោល ហើយបានបង្ហាញខ្លួននៅក្នុងកម្មវិធីទូរទស្សន៍ជាច្រើន។ កាលពីខែឧសភា នាងបានសន្លប់នៅផ្ទះរបស់នាងហើយត្រូវបញ្ជូនទៅមន្ទីរពេទ្យ។
នាងហារ៉ា ក៏ត្រូវបានសារព័ត៌មានចុះផ្សាយផងដែរថា ធ្លាប់ប៉ុនប៉ងធ្វើអត្តឃាតខ្លួនឯងកាលពី ០៦ខែមុន ហើយរយៈពេលពីរសប្តាហ៍កន្លងទៅនេះ នាងបានរៀបចំកម្មវិធីតន្ត្រីទេសចរមួយ ដើម្បីអបអរការត្រឡប់ចូលសិល្បៈវិញថែមទៀតផង។ កាលពីខែតុលា កន្លងទៅថ្មីៗនេះ តារាចម្រៀង និងសម្តែងដ៏ល្បីគឺនាង Sulli បានធ្វើអត្តឃាតដោយសារជំងឺផ្លូវចិត្តក្នុងវ័យ ២៥ឆ្នាំ ដែលបានធ្វើឲ្យកក្រើកពិភពសិល្បៈនៅកូរ៉េខាងត្បូងយ៉ាងខ្លាំង ៕
