កាលពីពេលថ្មីៗនេះ សម្តេចតេជោនាយករដ្ឋមន្ត្រី ហ៊ុន សែន បានចាត់ឲ្យលោក គន់ គីម អនុប្រធានទី ១ គណៈកម្មាធិការជាតិគ្រប់គ្រង គ្រោះមហន្តរាយ ចុះទៅពិនិត្យស្វែងយល់ពីតម្រូវការចាំបាច់ និងសង់អគារសិក្សាជាបន្ទាន់សម្រាប់ការសិក្សារបស់សិស្ស ក្រោយពីទទួលព័ត៌មានថាសិស្សានុសិស្សអង្គុយរៀនលើកម្រាលតង់ក្រោមដើមឈើតាមរយៈការបង្ហោះសារដោយលោកគ្រូ-អ្នកគ្រូនៃសាលាបឋមសិក្សាអូរជុញ ខេត្តព្រះវិហារ។
បទបញ្ជា និងការផ្ដល់អគារសិក្សារបស់ប្រមុខនៃរាជរដ្ឋាភិបាល ខាងលើនេះ បានកើតឡើងភ្លាមក្រោយពីមានព័ត៌មាន និងរូបភាពសិស្សានុសិស្សមួយក្រុម នៃសាលាបឋមសិក្សាអូរជុញក្រាល កំរាលតង់រៀនក្រោមដើមឈើ ក៏ដោយសារពួកគេខ្វះបន្ទប់សិក្សា ហើយរូបភាពទាំងនេះត្រូវបានគេបង្ហោះ និងចែករំលែកនៅតាមបណ្ដាញសង្គម Facebook។
ទេសរដ្ឋមន្ដ្រី គន់ គីម បានបញ្ជាក់យ៉ាងដូច្នេះថា «សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត បានប្រើឲ្យខ្ញុំទៅមើលសាលាហ្នឹង ដើម្បីស្ដាប់ពីសេចក្ដីរាយការណ៍របស់លោកគ្រូ អ្នកគ្រូ សិស្សានុសិស្ស ត្រូវការប៉ុន្មាន។ គាត់ឲ្យសាងសង់អគារជូនពួកគេជាបន្ទាន់ ហើយពេលនេះ ខ្ញុំកំពុងធ្វើដំណើរទៅកន្លែងគោលដៅហ្នឹង»។
គួរបញ្ជាក់ដែថា សាលាបឋមសិក្សាអូរជុញមានទីតាំងស្ថិតនៅភូមិសែនរុងរឿង ១ ឃុំទឹកក្រហម ស្រុកជាំក្សាន្ត ខេត្តព្រះវិហារមានសិស្សសរុបចំនួន ៤២៥ នាក់ ក្នុងនោះសិស្សស្រី ២៣៤ នាក់ និង មានបន្ទប់រៀនចំនួន ៥ ធ្វើពីឈើប្រក់ស័ង្កសី៕
Home ព្រឹត្តិការណ៍ថ្មីៗ សម្តេចតេជោនាយករដ្ឋមន្ត្រី ហ៊ុន សែន បានចាត់អនុប្រធានទី ១ គណៈកម្មាធិការជាតិគ្រប់គ្រង គ្រោះមហន្តរាយសាងសង់អគារជាបន្ទាន់ជូនលោកគ្រូ អ្នកគ្រូ និងសិស្សនៅសាលាអូរជុញ ខេត្តព្រះវិហារ