វាគឺយប់ដំបូងរបស់គ្រួសារលោក Lewis នៅក្នុងគេហដ្ឋានថ្មីរបស់ពួកគេ ពេលដែលពួកគេរងការវាយប្រហារដោយស្រីស្រាតម្នាក់ មានភ្នែកខ្មៅ និងកម្លាំងខ្លាំងដូចខ្លា ហើយនិងតាំងខ្លួនធ្វើជាបិសាចរាត្រី។
ការចំណាយពេលយប់ដំបូងនៅក្នុងផ្ទះថ្មី វាតែងតែមិនស្រួលចិត្តប៉ុន្មាននោះទេ ប៉ុន្តែសម្រាប់គ្រួសារលោក Lewisរស់នៅក្នុងទីក្រុង Chesterfield រដ្ឋ Virginia សហរដ្ឋអាមេរិក ពួកគេស្ទើរតែស្លាប់ខ្លួនឯងទៅហើយ។
យោងតាមសេចក្តីរាយការណ៍មួយពីកសែត WRIC បានឲ្យដឹងថា ស្រីស្រាតម្នាក់បានបើកការវាយប្រហារមកលើផ្ទះថ្មីរបស់គ្រួសារលោក Lewis ស្ថិតនៅលើផ្លូវ South Twilight Laneដោយនាងបានអះអាងថា នាងគឺជាបិសាចរាត្រី និងបានវាយប្រហារមកលើពួកគេ។
ការប្រយុទ្ធគ្នាដូចក្នុងរឿងហុងកុងនេះដែរ បានបញ្ចប់ទៅជាមួយនឹងការបាញ់គំរាម៣៩គ្រាប់ ធ្វើឲ្យឈាមប្រឡាក់ដាបកម្រាលព្រំ និងជញ្ជាំងផ្ទះ ហើយជញ្ជាំងផ្ទុះធ្លុះធ្លាយដោយសារគ្រាប់កាំភ្លើង។ ថ្វីត្បិតតែវាបានកន្លងផុតទៅពិតមែន តែវានៅតែជាឧប្បត្តិហេតុដ៏គួរឲ្យរន្ធត់ជាទីបំផុតសម្រាប់គ្រួសារលោក Lewis។
លោកស្រី Melissa Lewis បាននិយាយថា នាងចូលមកដើម្បីសម្លាប់ពួកយើង។ នោះគឺជាបំណងរបស់នាងតែមួយគត់ដើម្បីសម្លាប់ពួកយើង។ នាងបានវាយប្រហារពួកយើង និងចាប់ផ្តួលគាត់ និងព្យាយាមដាល់គាត់គ្មានត្រាប្រណីនោះឡើយ។
ស្រីស្រាតម្នាក់នេះ បានអះអាងថា នាងគឺជាបិសាច ភ្នែករបស់នាងឡើងខ្មៅ ហើយនាងពិតជាមានកម្លាំងខ្លាំងក្លាណាស់។
គ្រួសារមួយនេះ បានពន្យល់ថា ស្រីចម្លែកម្នាក់នេះ បានសើចខ្លាំងៗ បដិសេធន៍មិនព្រមចេញនោះទេ ហើយរឹតតែរុលចូលថែមទៀតផង។ នោះហើយគឺជាហេតុផលដែលនាំឲ្យលោក Lewis ដែលជាឪពុកកូន៣ ទាញ់កាំភ្លើងបាញ់តែម្តង។
លោក Lewis បានសួរថា តើអ្នកឯងជានរណា? នាងឆ្លើយថា នាងត្រូវការជំនួយពីអ្នក។ លោកបាននិយាយថា ចេញពីផ្ទះរបស់លោកភ្លាម តែនាងនៅតែរឹតចូល និងនិយាយថា នាងគឺជាបិសាច។
ក្រោយពីព្រមានចុងក្រោយមកលើនារីម្នាក់នោះ លោកក៏បាញ់ផូងតែម្តង។ តែគ្មានគ្រាប់កាំភ្លើងណាមួយមានបំណងបាញ់ឲ្យចំនាងនោះទេ។ លោក Lewisបន្តថា នាងមិនឈប់នោះទេ ហើយនាងមានកម្លាំងខ្លាំងដូចខ្លាអញ្ចឹង។
ទោះបីជាយ៉ាងណាក៏ដោយ ស្រីស្រាតម្នាក់នេះ មិនទាន់ត្រូវបានគេផ្តល់អត្តសញ្ញាណនោះទេ ថ្វីត្បិតតែនាងត្រូវបានចាប់ខ្លួនក៏ដោយ ហើយបច្ចុប្បន្ននាងកំពុងតែទទួលការព្យាបាលរបួសរបស់នាងនៅក្នុងមន្ទីរពេទ្យក្នុងស្រុក៕
Home ព្រឹត្តិការណ៍ថ្មីៗ ស្រីស្រាតកម្លាំងដូចខ្លាតាំងខ្លួនជាបិសាចវាយប្រហារមកលើគ្រួសារមួយនៅរដ្ឋ Virginia