ក្រសួងធនធាទឹក និងឧតុនិយមបានឲ្យដឹងថា ចាប់ពីថ្ងៃទី១០ ដល់ថ្ងៃទី១៦ ខែធ្នូ ប្រទេសកម្ពុជានឹងបន្តទទួលភាពត្រជាក់ចាប់ពី១៧ដល់១៩អង្សាសេ។
នេះបើយោងតាមសេចក្តីជូនដំណឹងរបស់ក្រសួងធនធានទឹកបានឲ្យដឹងនៅថ្ងៃទី៩ ខែធ្នូ ឆ្នាំ២០១៩ ស្ដីពីស្ថានភាពធាតុអាកាស ចាប់ពីថ្ងៃទី១០ ដល់ថ្ងៃទី១៦ ខែធ្នូ ឆ្នាំ២០១៩ លើកឡើងថា តាមរយៈការតាមស្ថានភាពធាតុអាកាសជាប់បន្ត សង្កេតឃើញថា ចាប់ពីថ្ងៃទី១០ ខែធ្នូ ឆ្នាំ២០១៩ ឥទ្ធិពលជ្រលងសម្ពាធខ្ពស់ដែលបានគ្រប់ដណ្តប់លើកម្ពុជានោះ នឹងចុះ ថមថយដោយរំកិលឡើងលើទៅជាលំដាប់ ។ ក្នុងនោះក៏សូមឲ្យបងប្អូននៅតាមបណ្តាលខេត្តមួយចំនួនប្រុងប្រយ័ត្នចំពោះសុខភាព
១. ខេត្តឧត្តរមានជ័យ ព្រះវិហារ ស្ទឹងត្រែង រតនគិរី មណ្ឌលគិរី និងខេត្តប៉ៃលិន សីតុណ្ហភាពអប្បបរមា មានពី ១៧-១៩ អង្សារសេ និងសីតុណ្ហភាពអតិបរមា មានពី ២៤-២៦អង្សារសេ។
២. ខេត្តបន្ទាយមានជ័យ សៀមរាប បាត់ដំបង កំពង់ធំ ពោធិ៍សាត់ ក្រចេះ និងខេត្តកោះកុង សីតុណ្ហភាពអប្បបរមា មានពី ១៩-២១អង្សារសេ និងសីតុណ្ហភាពអតិបរមា មានពី ២៥-២៧អង្សារសេ។
៣. ខេត្តកំពង់ស្ពឺ កំពង់ឆ្នាំង កណ្តាល ព្រៃវែង ស្វាយរៀង កំពង់ចាម ត្បូងឃ្មុំ និងរាជធានីភ្នំពេញ សីតុណ្ហភាពអប្បបរមា មានពី ២០-២២អង្សារសេ និងសីតុណ្ហភាពអតិបរមា មានពី ២៧-២៩ អង្សារសេ។
៤. ខេត្តតាកែវ កែប កំពត និងខេត្តព្រះសីហនុ សីតុណ្ហភាពអប្បបរមា មានពី ២២-២៤ អង្សារសេ និងសីតុណ្ហភាពអតិបរមា មានពី ២៨-៣០ អង្សារសេ។
-ចាប់ពីថ្ងៃទី១៤-១៦ ខែធ្នូ ឆ្នាំ២០១៩៖
១. បណ្តាខេត្តនៅជាប់ក្បែរតំបន់ជួរភ្នំដងរែក និងខ្ពង់រាប សីតុណ្ហភាពអប្បបរមា មានពី ២១-២៣អង្សារសេ និងសីតុណ្ហភាពអតិបរមា មានពី ២៨-៣១អង្សារសេ។
២. បណ្តាខេត្តនៅតំបន់វាលទំនាបកណ្តាល និងតំបន់មាត់សមុទ្រ សីតុណ្ហភាពអប្បបរមា មានពី ២២-២៥អង្សារសេ និងសីតុណ្ហភាពអតិបរមា មានពី ២៩-៣២អង្សារសេ។
គួរបញ្ជាក់ដែរថា ខណៈនៅកម្ពុជាយើងក្នុងខែធ្នូនេះ អាកាសធាតុមានលក្ខណៈចុះត្រជាក់ខ្លាំងគួរឲ្យកត់សម្គាល់ ប្រព័ន្ធផ្សព្វផ្សាយនៅឡាវបានរាយការណ៍ថា នៅដែនដីភាគខាងជើងនៃប្រទេសជិតខាងពួកយើងមួយនេះ កំពុងធ្លាក់ចុះសីតុណ្ហភាពខ្លាំង។ នេះបើតាមការដកស្រង់ការផ្សាយចេញពីសារព័ត៌មាន ABC Laos News នៅថ្ងៃអាទិត្យ ទី០៨ ខែធ្នូ ឆ្នាំ២០១៩។
គួរជម្រាបថា យោងតាមការចុះផ្សាយរបស់សារព័ត៌មានឡាវខាងលើ នាព្រឹកថ្ងៃអាទិត្យនេះ នៅតំបន់ភាគខាងជើងប្រទេសឡាវ កម្រិតសីតុណ្ហភាពបានធ្លាក់ចុះមកនៅត្រឹមក្រោមសូន្យអង្សាសេ គឺ -1°C ដែលជាកម្រិតទាបខ្លាំង។