….រឿងបាញ់បោះផូងៗសំដៅមេឃបើអ្នកនេះកែជាជនស៊ីវិលច្បាស់ជាបានដេកគុកហើយ…តែបើអ្នកនេះកែជាមន្ត្រីប្រដាប់អាវុធវិញមានករណីប្អូនបន្ថយដែរគ្រាន់តែទទួលរងនូវការពិន័យប៉ុណ្ណោះមិនរុញឲ្យទៅស្គាល់ទេ…កុំឲ្យបាត់មុខ។ នាយផ្នែកនគរបាលអន្ដោប្រវេសន៍ នៃច្រកទ្វារអន្ដរជាតិដូង ដែលបាញ់បោះសេរីរហូតដល់១៤គ្រាប់ ត្រូវទទួលរងពិន័យកងកម្លាំង តែប៉ុណ្ណោះ ។
មន្ដ្រីនគរបាលខេត្តបាត់ដំបង បានបង្ហើបប្រាប់អ្នកសារព័ត៌មានក្នុងស្រុកឲ្យដឹង ថា បន្ទាប់ពីបញ្ចប់ការសួរនាំនៅអធិការដ្ឋាននគរបាលស្រុកកំរៀងរួចមក មន្ដ្រីនគរបាលអន្ដោប្រវេសន៍ច្រកទ្វារអន្ដរជាតិដូង ដែលស្រវឹងស្រា បាញ់បោះសេរី១៤គ្រាប់នោះ ត្រូវបញ្ជូនទៅអគ្គនាយកដ្ឋានអន្ដោប្រវេសន៍ ដើម្បីដាក់ពិន័យកងកម្លាំង ពោលគឺមិនត្រូវបានបញ្ជូនទៅស្នងការដ្ឋាននគរបាលខេត្តបាត់ដំបង និងបន្តទៅតុលាការ នោះទេ ។គួររម្លឹកថា មន្ត្រីនគរបាលអន្ដោប្រវេសន៍ប្រចាំច្រកទ្វារអន្ដរជាតិដូង ខេត្តបាត់ដំបងម្នាក់ដែល ដកកាំភ្លើងបាញ់មេឃជាច្រើនគ្រាប់ បង្កការភ្ញាក់ផ្អើលដល់ពលរដ្ឋ និងសមត្ថកិច្ច កាលពីវេលាម៉ោង១០ និង២៥នាទីយប់ ថ្ងៃទី១០ ខែធ្នូ ឆ្នាំ២០១៩ ត្រង់ចំណុចភូមិដូង ឃុំបឹងរាំង ស្រុកកម្រៀង ។មន្ដ្រីនគរបាល ដែលស្រវឹងស្រាអាងខ្លួនមានកាំភ្លើងបាញ់បោះសេរី មានឈ្មោះ នៅ លីដា អាយុ ៣២ឆ្នាំ មានតួនាទីនាយផ្នែក នៃច្រកទ្វារអន្ដរជាតិដូង ។
ប្រភពពីកន្លែងកើតហេតុ បានឲ្យដឹងថា មុនពេលកើតហេតុ មន្ត្រីនគរបាលខាងលើ បានផឹកស្រាឡើងស្រវឹងជោកជាំ ហើយបានស្រែកឡូឡា និងនិយាយអួតអាងថា ខ្លួនមានខ្នងធំ ស្គាល់អ្នកធំនេះ ស្គាល់អ្នកធំនោះ ហើយរូបគេគ្មានខ្លាច ញញើតអ្នកណាទាំងអស់ រួចបានដកកាំភ្លើងខ្លីម៉ាក Sig Sauer បាញ់មេឃជាច្រើនគ្រាប់ ធ្វើឲ្យពលរដ្ឋនៅក្នុងស្រុកកម្រៀងមានការភ័យតក់ស្លុត អ្នកខ្លះរត់ចេញពីផ្ទះ ព្រោះខ្លាចត្រូវគ្រាប់កាំភ្លើងរបស់មន្ត្រីនគរបាលរូបនេះ ។ ក្រោយពីកើតហេតុ កម្លាំងសមត្ថកិច្ចបានចុះអន្តរាគមន៍ ឃាត់ខ្លួនខ្មាន់កាំភ្លើងនាំទៅសាកសួរនៅអធិការដ្ឋាននគរបាលស្រុកកំរៀង ៕
