កាលពីពេលកន្លងទៅនេះ អគ្គស្នងការរងនគរបាលជាតិ ទទួលបន្ទុកផែនសណ្តាប់ធ្នាប់ចរាចរណ៍ នាយឧត្តមសេនីយ៍ ហ៉ឹម យ៉ាន បានបញ្ជាក់ពីផែនការ របស់នគរបាលជាតិ ក្នុងការប្រើប្រាស់កាមេរ៉ាសុវត្ថិភាព ដែលបានបំពាក់តាមភ្លើងស្តុប ក្នុងរាជធានីភ្នំពេញ ដើម្បីពង្រឹកការអនុវត្តន៍ច្បាប់ចរាចរណ៍ ដោយនឹងផាកពិន័យដល់ផ្ទះ ចំពោះអ្នកដែលបើកបរមិនគោរពភ្លើងសញ្ញាចរាចរណ៍ និងចតល្មើសច្បាប់ជាដើម។
ការលើកឡើងរបស់នាយឧត្តមសេនីយ៍ ហ៉ឹម យ៉ាន ធ្វើឡើងក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក នៅទីស្តីការក្រសួងសាធារណការ និងដឹកជញ្ជូន។
លោក បានថ្លែងថា ដើម្បីអនុវត្តឱ្យបាននូវការងារអនុវត្ដច្បាប់ចរាចរណ៍ចំពោះអ្នកល្មើសច្បាប់គឺត្រូវទាមទារនូវការបណ្តុះបណ្តាលបច្ចេកទេសដល់មន្ត្រីនគរបាលចរាចរណ៍ជាមុនទើបអាចដំណើរការការងារនេះបានល្អ។
លោកថ្លែងបន្តថា៖ «យើងប្តេជ្ញាអនុវត្តការងារនេះឲ្យបានទោះបានលទ្ធផលប៉ុន្មាន យើងយកប៉ុណ្ណឹងដែលពេលនេះ មន្ត្រីរបស់យើងកំពុងតែបណ្តុះបណ្តាលឲ្យបានស្ទាត់ជំនាញសិនទើបអាចអនុវត្តបាន»។
លោកបញ្ជាក់ថា ក្រោយពេលទទួលបានលទ្ធផលនៃការអនុវត្ដនេះនគរបាលនឹងបន្ដផ្សព្វផ្សាយពីលទ្ធផលកិច្ចការងារនេះបន្ថែមទៀត ហើយការអនុវត្ដវិធានការផាកពិន័យដល់ផ្ទះនេះនឹងចាប់ផ្ដើមនៅដើមឆ្នាំ ២០២០ ខាងមុខ៕