…រឿងរ៉ាវព្រះសង្ឃគ្រប់គ្រងលុយកាក់ហើយចាយវាយទិញនេះទុកនោះតែអង្គឯងអត់ប្រាប់គណៈកម្មការអាចារ្យវត្តឲ្យដឹងច្រើនតែកើនមាននូវទំនាស់ទាស់ទែងគ្នា។ដូចករណី ព្រះសង្ឃ ព្រះនាម ជុំ វាសនា គង់នៅវត្តភ្នំខ្លា ស្ថិតនៅក្នុងភូមិព្រះរាមរង្សី ឃុំជ្រៃបាក់ ស្រុករលាប្អៀរខេត្តកំពង់ឆ្នាំង ត្រូវបានគណៈកម្មការវត្តអាចារ្យវត្ត និងពុទ្ធបរិ ស័ទចំណុះជើងវត្ត ចោទប្រកាន់ថា មានព្រះទ័យមិនស្មោះត្រង់ កាន់លុយកសាងវត្តតែអង្គឯង និងចាយវាយមិនអោយអ្នកណាដឹងបាត់លុយ ជាង៣០លានរៀលមិនដឹងទៅណា ។ ប៉ុន្តែ ព្រះអង្គ ជុំវាសនា បានបដិសេធថា រាល់ការចំណាយកសាងវត្តព្រះអង្គ មានរបាយការណ៍ និងបានរាយការជូនក្នុងអង្គប្រជុំជាមួយថ្នាក់ស្រុក និងឃុំរួចហើយ ម៉េចក៏យករឿងនេះមកនិយាយទៀត។លោក យឹម សូន ប្រធានគណកម្មការវត្តភ្នំខ្លា រួមនិងតាអាចារ្យ និងពុទ្ធបរិស័ទចំណុះជើងវត្ត បានប្រាប់អោយក្រុមអ្នកយកព័ត៌មាន ដឹងថា ព្រះអង្គ ជុំ វាសនា បាននិមន្តមកពីខេត្តតាកែវ និងបានសុំគង់នៅក្នុងវត្តភ្នំខ្លានេះ ដើម្បីជួយកសាងវត្តបាន១វស្សាហើយ តែគ្មានតួនាទីអ្វីឡើយជាព្រះភិក្ខុសង្ឃធម្មតា ។ ប៉ុន្តែការគង់នៅវត្តនេះ ព្រះអង្គបានចាត់ទុកអង្គឯងជាអ្នកគ្រប់គ្រងវត្ត ទុកដាក់លុយចំណូលរបស់វត្តខ្លួនឯង និងការចាយវាយផ្សេងៗក្នុងវត្ត គឺលោកអត្តនោម័ត ចាយវាយតែអង្គឯង មិនអោយគណៈកម្មការវត្តបានដឹងឡើយ ។
ដោយឡែក តាមការកត់ត្រារបស់គណៈកម្មការវត្តចំពោះការចំណូលធំៗក្នុងបុណ្យភ្ជុំបិណ្ឌ បុណ្យកឋិន និងបុណ្យផ្កា លុយកសាងវត្តសរុបមានចំនួន ៥៧លានរៀល ចំណែកដកការចំណាយទៅវិញគឺត្រូវនៅសល់ប្រមាណជាង៣០លានរៀល តែពេលសួរនាំទៅ លោកបានឆ្លើយថាលុយកសាងវត្តបានចំណាយអស់ហើយ គឺចាយវាយតែអង្គឯងគ្មានវិក័យបត្រ គ្មានគណៈកម្មការវត្តណាមួយបានដឹងឮឡើយ ។គណៈកម្មការអាចារ្យវត្ត បានបន្តអោយដឹងថា៖ ដើម្បីសម្របសម្រួលដោះស្រាយរឿង នេះ នៅល្ងាចថ្ងៃទី១៤ ខែមករា គណៈកម្មការវត្តបានទូលលោក អោយនិមន្តមកប្រជុំនៅព្រឹកថ្ងៃទី១៥ ខែមករា ជាមួយគណៈកម្មការវត្ត មេភូមិ និងពុទ្ធបរិស័ទក្នុងវត្ត ដើម្បីសាកសួរពីការទុកដាក់លុយ និងការចំណាយលុយកសាងវត្ត តើអស់ប៉ុន្មាន នៅសល់ប៉ុន្មាន និងមានគម្រោងរៀបចំអោយមានបេឡាកាន់លុយវត្ត អោយបានត្រឹមត្រូវឡើងវិញ តែលោកមិននិមន្តមកប្រជុំទេ ។ ដោយឡែកពេលប្រជុំសមូហភាពក្នុងអង្គប្រជុំមានគណៈកម្មកា អាចារ្យវត្ត ពុទ្ធបរិស័ទ ប្រជាពលរដ្ឋ រួមនិងលោ កមេភូមិ បានឯកភាពគ្នា ប្តិតមេដៃមិនអោយ ព្រះអង្គ ជុំ វាសនា គង់នៅក្នុងវត្តភ្នំខ្លាទៀតឡើយ ។លុះដល់ប្រមាណម៉ោង១៣រសៀល ពេលលោកនិមន្តមកដល់វត្តវិញ ក៏បាននិមន្តចូលបន្ទប់បិតទ្វារជាប់ ពេលគណៈកម្មការវត្ត ទៅនិមន្តហៅលោកអោយចេញមកក្រៅ ដើម្បីដោះស្រាយគ្នា និងមានថេរដិកាបំភ្លឺចំពោះក្រុមអ្នកកាសែត តែលោកមិនព្រមនិមន្តចេញពីបន្ទប់មកឡើយ ។លោកស្រី ប្រធានការិយាល័យធម្មការស្រុក បានអោយដឹងថា៖ តាមពិតវត្តនេះមានឈ្មោះជាអាស្រមនៅឡើយទេ និងទាំងគណ៖កម្មការវត្ត ទាំងព្រះអង្គ ជុំ វាសនា ក៏មិនទាន់មានការចាត់តាំង ឬតែងតាំងតួនាទីជាផ្លូវការនៅឡើយទេ ។ព្រះអង្គ ជុំ វាសនា ដែលរងការចោទប្រកាន់ បានមានថេរដិកាថា៖ កាលពីថ្ងៃទី០៩ ខែមករា ក្រុមប្រឹក្សាស្រុក និងលោកមេឃុំជ្រៃបាក់ បានមកប្រជុំ ដោះស្រាយរឿងនេះរួចហើយ ដែលពេលនោះ លោកក៏បានបង្ហាញ របាយការណ៍នៃការចំណូល និងចំណាយលុយកសាងវត្តរួចអស់ដែរ គឺមិនមាននៅសល់លុយកសាងវត្តទៀតទេ ហេតុអីថ្ងៃនេះគណៈកម្មការអាចារ្យវត្តលើកយករឿងដដែលៗនេះមកនិយាយទៀត ចំណែកឡានដែលលោកទិញជិះ គឺជាលុយផ្ទាល់ខ្លួនលោកទេ ។
ក្នុងពេលនោះ ខាងគណៈកម្មការវត្ត បានបញ្ជាក់ថា៖ ព្រះអង្គ ជុំ វាសនា មានរបាយការណ៍ចំណាយពិតមែន តែរបាយការណ៍នោះ គឺធ្វើតែអង្គឯងគ្មានវិក័យបត្រចំណាយត្រឹមត្រូវ និងគ្មានគណៈកម្មកាវត្តណាបានដឹងឮឡើយ ។ ម្យ៉ាងទៀត ២ថ្ងៃមុននេះលោកបានលក់ស្រូវក្នុងវត្តជិត៣តោនទៀតបានលុយរាប់លានរៀលទៀត តើលុយលក់ស្រូវនោះនៅឯណា និងលោកបានទិញឡានកាមរី៩៦ មួយគ្រឿងទៀ ត តម្លៃ ៤៥០០ដុល្លា និងថាជួលជុលអស់ដល់ទៅ៧០០០ដុល្លា ឥឡូវយកឡានទៅលាក់បាត់ទៀត ដូច្នេះទើបគណៈកម្មការវត្តមិនទុកចិត្ត ខ្លាចលោករត់គេចបាត់ តើលុយនៅជំពាក់ថ្លៃជាង បានអ្នកណាសង ។នៅក្នុងការសម្របសម្រួលល្ងាចនោះដែរ លោកស្រីប្រធានការិយាល័យធម្មការស្រុក និងព្រះអង្គជំនួយការ ព្រះអនុគណស្រុក បានមានថេរដិកាឯកភាពគ្នាថា៖ រឿងនេះដោះស្រាយមិនទាន់ចេញទេដោយត្រូវកំណត់លើកទៅប្រជុំដោះស្រាយនៅព្រឹកថ្ងៃទី១៧ ខែមករា ខាងមុននេះ ។ ដូច្នេះទាំងគណៈកម្មការវត្ត និងព្រះអង្គ ជុំ វាសនា ត្រូវមានរបាយការណ៍ច្បាស់លាស់ដូចគ្នា ពិសេសគឺត្រូវមានវិក័យបត្រចំណាយនានា មកដាក់អោយក្រុមការងារចម្រុះថ្នាក់ស្រុក ត្រួតពិនិត្យដោះស្រាយ ហើយរឿងនេះត្រូវមានការយោគយល់អនុគ្រោះ និងទទួលស្គាល់កំហុសខ្លះៗដែលកើតមាន ពីរឿងខ្វះការសហការគ្នាកន្លងមក និងត្រូវស្រុះស្រួលគ្នា ទើបអាចដោះស្រាយរឿងនេះបាន ៕
Home ព្រឹត្តិការណ៍ថ្មីៗ អាសន្នធំហើយ…កាន់លុយតែអង្គឯង…ចាយខ្ទេចគ្មានសល់…ដល់អាចារ្យៗសួរនាំមិនដឹងយ៉ាងម៉េចយ៉ាងម៉ានោះទេ