…រស់នៅតែម្នាក់ឯងហើយភ្នែកថែមទាំងពិការមើលអ្វីមិនឃើញទាំងគូទៀត ប៉ុន្តែស្ត្រីម្នាក់នេះពុំបានចុះចាញ់នូវព្រហ្មលិខិតនោះទេ។ នាងបានតស៊ូក្នុងឆាកជីវិតរហូតសម្រេចបាននូវសមិទ្ធផលមួយដែលមនុស្សភ្នែកភ្លឺខ្លះធ្វើមិនបានដូចនាងផង។ អ្នកស្រី Esah Hussin អាយុ៤២ឆ្នាំ ជាជនពិការ ត្រូវឪពុកម្ដាយបោះបង់ចោលតាំងពីចាប់កំណើតមកម្ល៉េះ។ ក្នុងរយៈពេល១៩ឆ្នាំកន្លងទៅនេះ គាត់បានដាក់ប្រាក់សន្សំចំនួន៥០០រីងហ្គីត គឺប្រមាណ១២០ដុល្លារអាមេរិក ជារៀងរាល់ខែ ក្នុងកំឡុងពេលកំពុងបម្រើការងារជាអ្នកប្រមូលឯកសារ និងជាអ្នកផ្ដល់ព័ត៌មានផ្នែកលក់តាមទូរស័ព្ទ។កាលពីពេលកន្លងទៅ ថ្មីៗនេះ គាត់បានដកប្រាក់សន្សំមួយចំនួន ដើម្បីទិញផ្ទះតូចល្មមមួយខ្នងដែលមានទីតាំងស្ថិតនៅទីប្រជុំជន Tanjung Tokong ក្នុងតម្លៃ៧២,៥០០រីងហ្គីត ប្រមាណ១៧,៥១០ដុល្លារអាមេរិក។
អ្នកស្រី Esah បាននិយាយថា៖ «ខ្ញុំពិតជាសប្បាយចិត្ត និងស្កប់ស្កល់នឹងអ្វីដែលខ្ញុំកំពុងមានសព្វថ្ងៃនេះ ហើយពេលខ្ញុំផ្លាស់មករស់នៅផ្ទះថ្មី មិត្តភក្តិរបស់ខ្ញុំបានមកជប់លៀងទៀតផង។ ខ្ញុំកំពុងរៀនទម្លាប់រស់នៅម្នាក់ឯងក្នុងផ្ទះថ្មី។ មានមនុស្សជាច្រើនគាំទ្រ និងលើកទឹកចិត្តខ្ញុំ ហើយខ្ញុំពិតជារំភើបដែលខ្ញុំមិនបានធ្វើឲ្យពួកគេខកចិត្ត។» ក្រោយពីត្រូវបានឪពុកម្ដាយបោះបង់ចោល អ្នកស្រី Esah បានធំលូតលាស់ឡើងនៅក្នុងមណ្ឌលកុមារកំព្រាមួយកន្លែងក្នុងរដ្ឋ Kelantan ប្រទេសម៉ាឡេស៊ី។ លុះដល់វ័យសិក្សាថ្នាក់វិទ្យាល័យ គាត់បានផ្លាស់ទៅរស់នៅមណ្ឌលកុមារកំព្រាមួយកន្លែងទៀតនៅក្នុង Setapak ទីក្រុងគូឡាឡាំពួ។ បន្ទាប់ពីបញ្ចប់ការសិក្សារួចមក គាត់បានផ្លាស់ទៅរស់នៅមណ្ឌល St. Nicholas Home ដែលជាកន្លែងផ្ដល់ឱកាសការងារ និងបង្រៀនគាត់ឲ្យចេះពីរបៀបរស់នៅ ជំនាញទំនាក់ទំនង និងយល់ដឹងពីព័ត៌មានបច្ចេកវិទ្យា។ ក្នុងកំឡុងពេលនោះដែរ គាត់ក៏បានធ្វើជាអ្នកចម្រៀងនៅក្នុងកម្មវិធីតូចៗ ដើម្បីបានប្រាក់បន្ដិចបន្តួចចិញ្ចឹមជីវិត។
អ្នកស្រី Esah ក៏បានផ្ដាំផ្ញើទៅកាន់មនុស្សទាំងអស់ដែលមានវាសនាដូចជារូបគាត់ផ្ទាល់ គួរតែតស៊ូប្រឹងប្រែងដោយខ្លួនឯង និងមិនចាំបាច់រំពឹងទៅលើនរណាម្នាក់នោះទេ៕