ភ្លាមៗក្រោយពីលឺសម្លេងក្មេងស្រីស្រែកយំ...ម្ចាស់ស្ថានីយ៍ប្រេងក៏ស្ទុះភ្លែតមកមើល ក៏ឃើញបុរសម្នាក់ដេកស្តូកស្តឹងក្នុងបន្ទប់ទឹករបស់ស្ថានីយប្រេង ធ្វើឲ្យម្ចាស់ស្ថានីយ៍ប្រហោងពោះ ធ្លុងគិតស្មានថាបុរសនោះបាត់បង់ជីវិតទៅហើយទើបក្មេងស្រីយំបែបនេះ។ លុះក្រោយមកទើបធូរទ្រូងខ្សាកវិញដ្បិតបុរសនោះអត់ស្លាប់ទេ គ្រាន់តែផឹកដាក់ហួសដួល សន្លប់តែប៉ុណ្ណោះ។
កាលពីថ្ងៃទី២១ ខែធ្នូ វេលាម៉ោង១១យប់ នៅមុខបន្ទប់ទឹកក្នុងស្ថានីយប្រេងឥន្ធនៈមួយកន្លែង ស្ថិតនៅក្នុងឃុំណនសាយរង ស្រុកមឿង ខេត្តត្រាត ប្រទេសថៃ ប៉ូលីសបានចុះទៅសួរនាំ បន្ទាប់ពីបានទទួលរបាយការណ៏ពីម្ចាស់ស្ថានីយ៏ប្រេងឥន្ធនៈថា មានបុរសម្នាក់បានដេកសន្លប់បាត់បង់ស្មារតីនៅខាងមុខបន្ទប់ទឹកស្ថានីយ ព្រមទាំងមានក្មេងស្រីម្នាក់អង្គុយក្បែរកំពុងតែយំ ដែលមើលទៅគួរឲ្យអានិតខ្លាំងណាស់។ពេលក្រុមប៉ូលីសបានចុះទៅដល់កន្លែងកើតហេតុ បានប្រទះឃើញក្មេងស្រីវ័យប្រហែល៤-៥ឆ្នាំ អង្គុយក្បែរបុរសជាឪពុកឈ្មោះផាត់ តាមការឲ្យដឹងពីមិត្តភក្ដិរបស់បុរសរូបនោះបានប្រាប់ប៉ូលីស ថា ខ្លួននឹងមិត្តភក្ដិ៣-៤នាក់ទៀតរួមទាំងបុរសជាឪពុកក្មេងស្រីម្នាក់នេះបានបង្កើតវង់ផឹកស៊ីនៅផ្ទះ។
បន្ទាប់ពីពួកគេផឹកស្រវឹងរៀងៗខ្លួនហើយ ក៏បែកគំនិតបបួលគ្នាទៅលេងបុណ្យដែលគេធ្វើនៅទីរួមខេត្ត តែពេលត្រឡប់មកវិញ ស្រាប់តែលោកផាត់ បានសុំចូលបន្ទប់ទឹកនៅស្ថានីយខាងលើ ដោយយកកូនស្រីទៅជាមួយដែល ហើយក៏បានដេកសន្លប់នៅមុខបន្ទប់ទឹកបែបនេះទៅ ដោយមានការឆ្ងល់ហេតុអីក៏ទៅបន្ទប់ទឹកយូរចម្លែកម្លេះ ពួកគេក៏បានដើរទៅមើលឃើញគាត់ដេកបាត់បង់ស្មារតី ប៉ូលីស បានព្យាយាមលួងលោមក្មេងស្រីនោះឲ្យបាត់យំ ព្រមទាំងបានហៅឡានពេទ្យដើម្បីធ្វើការសង្គ្រោះបុរសនោះភ្លាមៗ។
