…ពាក្យមួយឃ្លាបានពោលថា ‘’លួចគេបានវាគ្រាន់ តែបើគេទាន់វាក្រែលហើយ’’ តួយ៉ាងដូចបុរស-ស្ត្រីជាប្តីប្រពន្ធមួយគូនេះញ៉ាមចូលលួចបានរបស់របរមួយចំនួនក្នុងហាងបានដោយសុវត្ថិភាពក៏ទៅជាជឿលើហុងស៊ុយរបស់ពួកគេនៅខ្ពស់ត្រដែកអាចប្រកបមុខរបរ’’ រពឹសដៃ’’ នេះតទៅមុខទៀតបានមិនងាយភាត់ស្នៀតត្រូវគេតាមទាន់នោះឡើយ។ ប៉ុន្តែប្រៀបដូចជាពាក្យថា ដើរកាត់ព្រៃរមែងអីត្រូវបន្លាមុតនោះ គឺនៅថ្ងៃមួយ ទាំងពីរនាក់ប្តី-ប្រពន្ធមួយគូនេះជួបនូវក្តីអាម៉ាស់យ៉ាងខ្លាំង..។
ស្ត្រីម្នាក់នេះត្រូវបានសន្តិសុខក្នុងហាងចាប់ឃាត់ខ្លួន បន្ទាប់ពីនាងបានលួចបន្លំយកសាប៊ូកក់សក់ជាច្រើនដបដាក់ក្នុងខោ និងអាវក្នុង នៅឯហាងលក់អីវ៉ាន់មួយកន្លែង ក្នុងប្រទេសហ្វីលីពីន។ យោងតាមវីដេអូឃ្លីបដែលត្រូវបានបង្ហោះនៅលើបណ្ដាញសង្គមហ្វេសប៊ុកបង្ហាញឲ្យឃើញថា ស្ត្រីម្នាក់ជាប់ខ្នោះដៃជាមួយនឹងបុរសម្នាក់ទៀត ខណៈពេលសន្ដិសុខកំពុងលូកយកសាប៊ូកក់សក់ចេញពីក្នុងខោម្ដងមួយៗ បោះចូលទៅក្នុងកន្ត្រក់។ បន្ទាប់មកទៀត សន្ដិសុខបានលូកចូលអាវក្នុងស្ត្រីនោះ ទើបឃើញមានសាប៊ូកក់សក់ អាហារកំប៉ុង និងអាហារកញ្ចប់ផងដែរ។
ប្រភពបានឲ្យដឹងដែរថា ស្ត្រីរូបនោះបានលួចយកសាប៊ូកក់សក់លើសពី១២ដប អាហារកំប៉ុងចំនួន២ និងអាហារកញ្ចប់ចំនួន១។ ចំណែកបុរសដែលជាប់ខ្នោះត្រូវ ជាប្ដីរបស់ស្ត្រីនោះដែលបានជួយក្នុងការធ្វើសកម្មភាពលួច។ ក្រោយពីចាប់ដាក់ខ្នោះរួចមក ពួកគេទាំងពីរ ត្រូវបានប្រគល់ខ្លួនទៅឲ្យប៉ូលិស ដើម្បីដោះស្រាយបន្ដ៕
