ករណីម្ចាស់រថយន្តអូឌី បើកបុកយុវតីចំនួន ២នាក់ស្លាប់ កាលពីថ្ងៃទី១១ ខែធ្នូ ឆ្នាំ ២០១៩ ពេលនេះ កម្លាំងនគរបាលជំនាញ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងនគរបាល ខេត្តកណ្តាល នៅរសៀលថ្ងៃទី២៧ ខែធ្នូ ឆ្នាំ២០១៩នេះ បានធ្វើការឃាត់ខ្លួនបានហើយ ។
ក្រោយពីមានបទបញ្ជា ពីនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ កម្លាំងជំនាញបានធ្វើការស្រាវជ្រាវ តាមប័ណ្ណសំគាល់រថយន្ត ដែលកាមេរ៉ាសុវត្ថិភាពតាមផ្លូវ បានបង្ហាញរហូតឈានដល់ការឃាត់ខ្លួន អ្នកបើករថយន្ត និងរថយន្តនៅជិតស្ពានលីយ៉ុងផាត់ ក្នុងខណ្ឌជ្រោយចង្វារនៅរសៀលថ្ងៃនេះ។
យោងតាមបណ្ណសម្គាល់រថយន្តបង្ហាញថា ម្ចាស់រថយន្ត AUDI ពាក់ស្លាកលេខ ភ្នំពេញ 2AF-5659 មានឈ្មោះ សុមេត សុកន្ធរ័ត្នវត្តី មានទីលំនៅផ្ទះលេខ៣៣A ផ្លូវលេខ៣៣៧ សង្កាត់ឬស្សីកែវ ខណ្ឌឬស្សីកែវ។
គួររម្លឹកដែរថា យុវតី២នាក់ បានស្លាប់ឈ្មោះ ភ័ណ្ឌ ភីរ៉ាដា អាយុ១២ឆ្នាំ រៀនថ្នាក់ទី៧ និងម្នាក់ទៀតឈ្មោះ ខេន កូវ៉ា អាយុ១៣ឆ្នាំ រៀនថ្នាក់ទី៨ ដោយសាររថយន្តទំនើបបើកលឿន ដូចហោះ បុកពេញទំហឹង ពេលជនរងគ្រោះទាំងពីរនាក់ កំពុងជិះម៉ូតូឌុបគ្នាចេញពីរៀនភាសា កាលពីថ្ងៃទី១១ ខែធ្នូ ឆ្នាំ២០១៩ ដែលមានទីតាំងស្ថិតនៅភូមិរនះ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ៕
Home ព្រឹត្តិការណ៍ថ្មីៗ ម្ចាស់រថយន្ត AUDI បើកបុកយុវតីចំនួន ២នាក់ស្លាប់ ជាប់សំណាញ់របស់សមត្ថកិច្ចហើយ !