…ពិតជាព្រហើនពេកហើយបើសម្លេងធុងបាស់ខ្លាំងៗអត់មានក្រែងរអែងចិត្តអ្នកជិតខាងណាឡើយ..លុះដល់អាជ្ញាធរមកធ្វើការណែនាំឲ្យមានសុជីវធម៌ខ្លះៗស្រាប់តែមានឬកពារច្រង៉េងច្រង៉ាងបោះពាក្យសម្តីយ៉ាងព្រហើន។ តែនេះសំណាងហើយបានលោកចៅហ្វាយខណ្ឌដូនពេញមានធម៌ខន្តីពេញចិត្តក្នុងប្រាណមានការយល់យោគអត់ចាប់ទោសអូសដំណើរបានត្រឹមតែណែនាំបន្តិចបន្តួចក៏បកក្រោយត្រឡប់ចូលបន្ទាយវិញ។ ប៉ុន្តែបើប៉ះលោកចៅហ្វាយខណ្ឌចិត្តដែក ហ៊ានស្រែកជេរសមត្ថកិច្ច ប៉ុណ្ណោះហើយច្បាស់ជាអត់ស្លូតអត់ខន្តីអីជាមួយនោះឡើយប្រាកដជាអង្គុយសរសេរសំណុំរឿងបញ្ជូនទៅឲ្យថ្នាក់លើចាត់ការតាមច្បាប់ហើយ។
ពីថ្ងៃទី២៤ ខែធ្នូ ឆ្នាំ២០១៩ កម្លាំងគណៈបញ្ជាការឯកភាពខណ្ឌដូនពេញ ដឹកនាំដោយ លោក ចាន់ គន្ថេត អភិបាលរងខណ្ឌដូនពេញ បានចុះអប់រំណែនាំដល់ម្ចាស់អាជីវកម្មលក់ស្រាក្រឡុកដែលបានបើកសំឡេងធុងបាស់ខ្លាំងៗ និងមានភ្លើងពណ៌ចម្រុះ ។ក្នុងនោះកម្លាំងគណៈបញ្ជាការឯកភាពខណ្ឌ បានធ្វើការអប់រំណែនាំ និងជូនដំណឹងដល់ម្ចាស់អាជីវកម្មលក់សាក្រឡុកនៅពេលយប់ កុំឲ្យបើកសំឡេងធុងបាសឮខ្លាំងៗ និងបិទភ្លើងពណ៌ចម្រុះមួយចំនួន ពួកគាត់ក៏ចូលរួមសហការជាមួយអាជ្ញាធរខណ្ឌ ប៉ុន្តែដោយឡែកមានម្ចាស់ហាងមួយ ដែលមានយីហោឈ្មោះ SWEET HOUSE គាត់ពុំបានចូលរួមជាមួយអាជ្ញាធរខណ្ឌឡើយ ហើយថែមទាំងនៅតែបន្តបើកភ្លើងពណ៌មួយចំនួនដែលអាជ្ញាធរណែនាំ និងបានជេរប្រមាថ ដល់អាជ្ញាធរខណ្ឌ ប្រើប្រាស់ពាក្យដីមិនសមរម្យមួយចំនួនថែមទៀតផង ។
ដោយយោងបទបញ្ជា ក៏ដូចជាការសំណូមពររបស់ក្រសួងព្រះបរមរាជវាំងផងនោះ នៅថ្ងៃទី២៥ ខែធ្នូ ឆ្នាំ២០១៩នេះ រដ្ឋបាលខណ្ឌ បានសម្រេចបិទអាជីវកម្មខាងលើទាំងស្រុងទុកជាការព្រមាន៕
