កាលពីប៉ុន្មានថ្ងៃនេះ មានការចែករំលែកព័ត៌មានយ៉ាងខ្លាំងក្លានៅលើបណ្តាញសង្គមហ្វេសប៊ុកជុំវិញករណី កសិករដាំស្ពៃជើងទា ដែលមានទីតាំងស្ថិតនៅភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង ប្រកាសចែកស្ពៃជើងទាជាង១០តោន ឲ្យពលរដ្ឋដែលមានបំណងចង់បាន ដោយឥតគិតថ្លៃ ដោយសារលោកខកចិត្តចំពោះ ទីផ្សារ បន្ថែដែលមានតម្លៃទាបពេក ។
លោកអ៊ឹម សុភ័ក្រ ជាកសិករដាំស្ពៃខាងលើ បាននិយាយថា ឆ្នាំនេះ គាត់បានដាំដំណាំស្ពៃ «ជើងទា» នេះ លើផ្ទៃដីទំហំជិត១ហិចតា រីឯអ្នកភូមិដទៃទៀតក៏ដាំដំណាំស្ពៃនេះជាច្រើនកន្លែងដូចគ្នាដែរ តែដល់ពេលប្រមូលផល ស្រាប់តែទីផ្សារធ្លាក់ចុះ ហើយស្ទើរតែគ្មានម៉ូយរកទិញទៀតផង។ គាត់បានប្រាប់ថា ដំណាំស្ពៃគាត់បានចាប់ផ្ដើមប្រមូលផលមុនគេ ដែលដំបូងលក់បានតំលៃ៥០០រៀលក្នុង១គីឡូក្រាម។ លុះប្រមូលផលលក់បានត្រឹម៦០% ស្រាប់តែតំលៃស្ពៃធ្លាក់ចុះសល់ត្រឹម៣០០រៀលក្នុង១គីឡូក្រាម ហើយស្ទើរតែគ្មានអ្នកទទួលទិញទៀត។
លោកបានបន្តទៀតថា៖ ខ្ញុំមិនចង់លក់ស្ពៃទាំងនេះទេ ដោយសារតម្លៃទាបពេកត្រឹម៣០០រៀល ហើយអ្នកទិញ ទិញចំនួនតិចៗ (ទិញយកទៅបរិភោគ ឬលក់ខ្លះ) មិនមែនម៉ៅទិញទាំងអស់ផង។ អ៊ីចឹង ខ្ញុំសម្រេចចិត្តឲ្យពលរដ្ឋនៅក្នុងស្រុកដែលចង់បានមកកាត់យក» ។
យ៉ាងណាមិញចំពោះករណីនេះបើយោងតាមសេចក្ដីប្រកាសព័ត៌មាន របស់មន្ទីរកសិកម្មខេត្តបាត់ដំបង នៅថ្ងៃទី២៦ ខែធ្នូ ឆ្នាំ២០១៩បានឲ្យដឹងថា ក្រោយទទួលបានដំណឹង ប្រធានមន្ទីរបានបញ្ជូន ក្រុមការងារទៅជួប លោក អ៊ឹម សុភ័ក្រ ដែលជាម្ចាស់ចម្ការផ្ទាល់ ។ លោក អ៊ិន សុវណ្ណមុន្នី អនុប្រធានមន្ទីរកសិកម្មខេត្តបាត់ដំបង បាននិយាយថា ដំណោះស្រាយប្រជាកសិករនោះ គឺពួកគេត្រូវចេះរៀបចំផែនការក្នុងការដាំដុះនិងការប្រមូលផល រួមទាំងការប៉ានប្រមាណតម្រូវការទីផ្សារ។ លោក សុវណ្ណមុន្នី បានបញ្ជាក់ថា ខាងមន្ទីរកសិកម្មរួមទាំងមន្ទីរពាណិជ្ជកម្ម បានជំរុញឲ្យកសិករ និងអ្នកទិញកសិកម្មតាមបែបកិច្ចសន្យានោះ (Contract Farming) ព្រមព្រៀងគ្នា ពាក់ព័ន្ធនឹងបរិមាណផ្គត់ផ្គង់ គុណភាពកសិផល ថ្លៃកសិផល ពេលវេលាទិញនិងលក់។ ការធ្វើបែបនេះ នឹងជួយឲ្យកសិករមិនព្រួយបារម្ភពីតម្លៃទីផ្សារ។
គួរបញ្ជាក់ដែរថា កាលពីពេលកន្លងទៅកសិកររូបនេះ បានអំពាវនាវឲ្យស្ថាប័នពាក់ព័ន្ធ ជួយដោះស្រាយនិងរកទីផ្សារសម្រាប់គាត់ ខណៈស្ពៃជាច្រើនតោនកំពុងប្រឈមមុខនឹងការខូចខាត ដោយសារគ្មានអ្នកបញ្ជាទិញ៕