...នៅក្នុងប្រទេសថៃក៏ដូចជានៅតាមបណ្តាប្រទេសមួយចំនួនទៀតគេមានជំនឿថា អ្នកដែលចែងឋានទៅទាំងមិនទាន់បានរៀបការព្រលឹងសពប្រាកដជាវិលដល់ទួញសោកបោកសង្រេងហើយ...ខុសពីព្រលឹងសពដែលបានរៀបការរួច គឺធ្វើដំណើរទៅកាន់លោកខាងមុខទាំងព្រលឹងស្ងប់ស្ងាត់អត់វិលវល់អីនោះទេ។
ព្រោះតែដើម្បីឲ្យព្រលឹងស្រីស្នេហ៍ចាកចេញពីរូបកាយទាំងព្រលឹងស្ងប់ស្ងាត់នោះ ថ្មីៗនេះ បុរសជនជាតិថៃម្នាក់ បានធ្វើឲ្យមនុស្សជាច្រើននៅលើបណ្ដាញសង្គមហ្វេសប៊ុកចាប់អារម្មណ៍យ៉ាងខ្លាំងបន្ទាប់ពីលោក បានសម្រេចចិត្តរៀបការជាមួយគូស្នេហ៍របស់ខ្លួនៅក្នុងមន្ទីរពេទ្យ ខណៈដែលនាងកំពុងមានជំងឺមហារីកដំណាក់កាលចុងក្រោយ គ្មានសង្ឃឹមថានឹងបានរស់យូរឡើយ ។ចំពោះពិធីមង្គលការដ៏តូចមួយនេះ ត្រូវបានរៀបចំឡើងប្រកបដោយភាពសោកសង្រេងជាទីបំផុត ។បុរសឈ្មោះ កុក បានសម្រេចចិត្ត ដើម្បីបំពេញបំណង នាង ឌៀរ មុនពេលនាងស្លាប់ ។ក្រោយពេលរៀបការបានតែប៉ុន្មានថ្ងៃ នាង ឌៀរ បានទទួលមរណៈភាពហើយ ហើយចំពោះមរណៈភាពរបស់នាង បានធ្វើឲ្យមនុស្សមិនតិចនាក់ឡើយ សោកស្ដាយ ព្រមទាំងអាណិតនាងយ៉ាងខ្លាំង ។
លោក កុក បានសរសេររៀបរាប់នៅលើគណនីហ្វេសប៊ុករបស់លោក យ៉ាងដូច្នេះថា «បងនឹងចងចាំអូនក្នុងចិត្តរហូត ហើយទោះជានឹកអូនខ្លាំងប៉ុណ្ណា ក៏បងត្រូវតែរឹងម៊ាំជានិច្ច» ជាមួយគ្នានេះដែរ ក្រៅពីនេះលោកកុកថែមទាំងបានង្ហោះវីដេអូឃ្លីប ដែលបង្ហាញពីសកម្មភាពផ្អែមល្ហែមរបស់លោក និងមិត្តស្រី កាលនៅរស់ ដែលកាន់តែធ្វើឲ្យអ្នកប្រើប្រាស់បណ្ដាញសង្គមហ្វេសប៊ុករំជួលចិត្តថែមទៀត ៕