កាលពេលកន្លងទៅនេះ ក្មេងប្រុសម្នាក់រស់នៅក្នុងទីក្រុង Shah Alam ប្រទេសម៉ាឡេស៊ី ត្រូវបានបញ្ជូនទៅមន្ទីរពេទ្យភ្លាមៗ បន្ទាប់ពីត្រូវបានកូនពស់មួយក្បាលចឹក។ជាក់ស្តែង តាមរយៈការបង្ហោះវីដេអូចែកចាយនៅលើបណ្តាញសង្គមហ្វេសប៊ុកដោយាំគេហទំព័រឈ្មោះ Durian Media បានបង្ហាញឲ្យឃើញថា ក្មេងប្រុសរូបនោះបានយកប្រដាប់លេងរបស់ខ្លួនម្តងមួយៗចេញពីកន្ត្រកពណ៌ក្រហម។ នៅពេលដែលក្រឡាប់កន្ត្រក គេក៏ចាប់អារម្មណ៍អ្វីម្យ៉ាងនៅពីក្រោមកន្ត្រក។
បន្ទាប់មក គេបានព្យាយាមចាប់ទាញកូនពស់មួយក្បាលដែលកំពុងជាប់ខ្លួនក្នុងប្រហោងកន្ត្រកនោះចេញ។ ក្រោយមក គេបានប្រមូលប្រដាប់លេងដាក់ចូលទៅក្នុងកន្ត្រក រួចដើរចូលទៅក្នុងផ្ទះវិញ។ ភ្លាមៗនោះស្រាប់តែកូនពស់បានចឹកចំជង្គង់ បណ្តាលឲ្យគេស្រែកយំយ៉ាងខ្លាំង។ បុរសជាឪពុកភ័យស្លន់ស្លោរ ស្ទុះទៅទាញកន្ត្រកនោះចេញ ចំណែកស្ត្រីជាម្តាយបានយកក្រណាត់ទៅរុំជង្គង់កូនប្រុស ដើម្បីឃាត់ពិសមិនឲ្យជ្រាបចូលរាងកាយ។
យ៉ាងណាមិញ ក្មេងប្រុសនោះត្រូវបានឪពុកម្តាយបញ្ជូនទៅកាន់មន្ទីរពេទ្យដើម្បីព្យាបាលភ្លាមៗផងដែរ។ សម្រាប់ការបង្ហោះវីដេអូនោះដែរ គឺដើម្បីចង់ដាស់តឿនដល់ឪពុកម្តាយគ្រប់រូបឲ្យមានការប្រុងប្រយ័ត្នចំពោះកូនតូចៗចៀសវាងមានគ្រោះថ្នាក់បែបនេះកើតឡើង៕