…មួយរយៈកន្លងមកនេះគេបានសង្កេតឃើញថាលោកផែង វណ្ណៈបានបង្ហោះនូវរឿងរ៉ាវផ្សេងៗមួយចំនួនហើយតាមការពឹងពាក់របស់ជនរងគ្រោះដើម្បីទម្លាយចេញនូវអ្វីដែលជាក្តីឈឺចាប់របស់ខ្លួន។ កាលពីម្សិលមិញនេហលោក ផែង វណ្ណៈបានសរសេររៀបរាប់ថានៅព្រឹកថ្ងៃទី ៧ ខែ មករា ឆ្នាំ ២០២០ លោកយាយ LORRAIN ep KLEIN Dominique Marie Alizabeth អាយុ ៧៥ ឆ្នាំ ជនជាតិ បារាំង អតីតប្រធានអង្គការ សម្រស់ភក្ត្រាកុមារខ្មែរ ESK បានមកជួបខ្ញុំ ផែង វណ្ណៈ ដើម្បីអោយជួយលោកយាយអំពីរឿងកូនធម៌លោកយាយលួចលក់ផ្ទះលោកយាយនៅសង្កាត់ ផ្សារដើមថ្កូវ ខណ្ឌចំការមន រាជធានីភ្នំពេញ ។
លោកយាយ KLEIN បានរៀបរាប់ថា លោកយាយមកប្រទេសកម្ពុជា តាំងពីឆ្នាំ ១៩៩០ជាង ដើម្បីបើកអង្គការមួយជួយកុមារកម្ពុជា ។ លុះដល់ឆ្នាំ ១៩៩៦ លោកយាយ បានស្គាល់ឈ្មោះ សុខ សួនព្រលឹង និងបានស្រលាញពេញចិត្តយកលោក សុខ សួនព្រលឹង ធ្វើជាកូនធម៌ ។ នៅឆ្នាំ ២០០៥ លោកយាយ KLEIN បានទិញផ្ទះនិងដីមួយកន្លែងគឺផ្ទះលេខ ១៩ ផ្លូវលេខ ១៤៥ ក្រុមទី ២៣ សង្កាត់ផ្សារដើមថ្កូវ ខណ្ឌចំការមន តម្លៃ ៦៥០០០ ដុល្លារ ពីឈ្មោះ ជា អាន និង គង់ ចន្ធី ។ប៉ុន្តែ ដោយលោកយាយ KLEIN ជាជនជាតិ បារាំង មិនអាចឈរឈ្មោះជាម្ចាស់កម្មសិទ្ធិលើដីធ្លីផ្ទះសំបែងបាន លោកយាយបានអោយ ដាក់ឈ្មោះកូនធម៌លោកយាយគឺ ឧត្ដមសេនីយ៍ សុខ សួនព្រលឹង ជាម្ចាស់កម្មសិទ្ធិ ។ បន្ទាប់មកលោកយាយបានធ្វេីកិច្ចព្រមព្រៀងមួយជាមួយកូនធម៌ ដោយកូនធម៌ សុខ សួនព្រលឹង មានសិទ្ធិត្រឹមតែរស់នៅ តែគ្មានសិទ្ធិ លក់ដូរ ជួល បញ្ចាំ ឬ ផ្ដល់អំណោយ ឬ ផ្ទេរអោយអ្នកទៃឡើយ ។ស្រាប់តែនៅឆ្នាំ ២០១៩ កូនធម៌លោកយាយ ដែលជាឧត្ដមសេនីយ៍ត្រី សុខ សួនព្រលឹង នាយនគរបាលជាតិជាន់ខ្ពស់ នៅសាលាបណ្ឌិតសភានគរបាល និង ប្រពន្ធឈ្មោះ អ៊ុំ វណ្ណា នាយទាហានស័ក្តិប្រាំ បានលួចលក់ផ្ទះលោកយាយអោយទៅអ្នកដទៃដោយមិនបានប្រាប់លោកយាយអោយដឹង និង មិនបានយកលុយមកប្រគល់អោយលោកយាយជាម្ចាស់ផ្ទះឡេីយ ។ លោកយាយ KLEIN បានព្យាយាមទាក់ទងទៅកូនធម៌ជា ឧត្ដមសេនីយ៍ត្រី សុខ សួនព្រលឹង និង ប្រពន្ធ ឈ្មោះ អ៊ុំ វណ្ណា អោយចេញមុខមកដោះស្រាយជាមួយលោកយាយ តែកូនធម៌រូបនោះចេះតែពន្យាពេលរហូត ។ ហេតុនេះហើយទើបលោកយាយមកពឹង ខ្ញុំ ផែង វណ្ណៈ អោយជួយអន្តរាគមន៍ ។ បន្ទាប់ពីទទួលបានព័ត៌មានពីលោកយាយKLEIN នៅព្រឹកដដែលនេះ ខ្ញុំបានទូរស័ព្ទសួរទៅលោក សុខ សួនព្រលឹង ដើម្បីបញ្ជាក់អំពីបញ្ហានេះ លោកឧត្ដមសេនីយ៍ សុខ សួនព្រលឹង បានទទួលស្គាល់ថា គាត់ពិតជាបានលក់ផ្ទះនោះមែនបានតម្លៃជាង ៥០ ម៉ឺនដុល្លារ ។ លោកឧត្ដមសេនីយ៍ សុខ សួនព្រលឹង បានអោយដឹងទៀតថា ការលក់ផ្ទះនេះ ម្ដាយធម៌គាត់អោយលក់ដែរ ។ លោកឧត្ដមសេនីយ៍បានបន្ថែមថា លោកសុំអោយលុយ ១៥ ម៉ឺន ដុល្លារ ទៅម្ដាយធម៌លោកដែរ តែសុំពេល ៣ ខែ ទៀត តែម្ដាយធម៌មិនព្រម ។
ទោះជាយ៉ាងណាក្ដីលោកយាយ KLEIN នៅតែអះអាងថា លោកយាយ មិនបានអោយ កូនធម៌ឈ្មោះ ឧត្ដមសេនីយ៍ សុខ សួនព្រលឹង និង ប្រពន្ធ លក់ផ្ទះលោកយាយទេ ។ ពាក់ព័ន្ធនឹងរឿងនេះ អ្នកច្បាប់មួយរូបបានអោយដឹងថា ទង្វើរបស់លោកឧត្ដមសេនីយ៍ត្រី សុខ សួនព្រលឹង និង ប្រពន្ធ គឺជា អំពើល្មេីសច្បាប់ដែលអាចប្រឈមនឹងបទល្មើសរំលោភសេចក្ដីទុកចិត្ត ។ បើលោកយាយជនជាតិបារាំងនោះប្ដឹង លោកឧត្ដមសេនីយ៍ត្រី សុខ សួនព្រលឹង មិនអាចគេចផុតពីសំណាញ់ច្បាប់បានឡើយ។