…អស់លោកមហាសេដ្ឋីនៅស្រុកគេចូលចិត្តធ្វើរឿងប្លែកៗណាស់ដើម្បីឲ្យគេចាប់អារម្មណ៍។ សេដ្ឋីខ្លះគ្រាន់តែចង់បានស្ត្រីរូបស្រស់អមដំណើរដើរលេងជុំវិញពិភពលោករយៈពេលមួយខែ-ពីរហ៊ានឲ្យហ៊ានឲ្យថ្លៃឈ្នួលដល់ទៅខ្ទង់សែនដុល្លារ។ កាលពីពេលកន្លងទៅថ្មីៗនេះ មហាសេដ្ឋីជនជាតិជប៉ុនម្នាក់បានប្រកាសជ្រើសរើសមនុស្សស្រីម្នាក់ ដើម្បីធ្វើជាគូស្នេហ៍ និងរួមដំណើរកំសាន្តទៅកាន់ឋានព្រះច័ន្ទជាមួយគាត់។
មហាសេដ្ឋីរូបនេះ ឈ្មោះ Yusaku Maezawa អាយុ ៤៤ឆ្នាំ ហើយរូបលោកមានគម្រោងធ្វើដំណើរកំសាន្តទៅកាន់ឋានព្រះច័ន្ទនៅក្នុងឆ្នាំ ២០២៣ ខាងមុខនេះ។ គាត់បានឲ្យដឹងថា វាពិតជាឯកាណាស់ដែលគាត់ត្រូវទៅលេងនៅឋានព្រះច័ន្ទតែម្នាក់ឯងនោះ ព្រោះរហូតមកទល់នឹងពេលនេះគាត់នៅមិនទាន់មានគូស្នេហ៍នៅឡើយទេ ដូចនេះហើយទើបគាត់ត្រូវការមនុស្សស្រីម្នាក់ដើម្បីទៅដើរលេងជាមួយគាត់និងធ្វើជាគូស្នេហ៍របស់គាត់តែម្តង។តាមសេចក្តីប្រកាសផ្លូវការរបស់គាត់បានបញ្ជាក់ថា ស្ត្រីណាដែលចាប់អារម្មណ៍ចង់ធ្វើជាគូសេ្នហ៍របស់គាត់អាចដាក់ពាក្យបានចាប់ពីថ្ងៃនេះរហូតដល់ថ្ងៃទី ១៧ ខែមករា ហើយរូបគាត់នឹងធ្វើការពិនិត្យ និងជ្រើសរើសមនុស្សស្រីម្នាក់ដោយខ្លួនគាត់ ខណៈការសម្រេចចុងក្រោយនឹងត្រូវប្រកាសជាផ្លូវការនៅចុងខែមីនាខាងមុខនេះ។
សូមបញ្ជាក់ថា លោក Yusaku Maezawa ជាអ្នកជំនួញដ៏មានឥទ្ធិពលម្នាក់នៅក្នុងប្រទេសជប៉ុនហើយរូបលោកត្រូវបានគេរាយការណ៍ថា មានទ្រព្យសម្បត្តិសរុបប្រមាណជា ៣,៦ ពាន់លានដុល្លារអាមេរិក៕