…បុរសម្នាក់នេះពិតជាហេងតែម្តងហើយ..ពេលបើកទា្វចូលក្នុងបន្ទប់ទឹកគាត់គ្មានបានក្រឡេកភ្នែកមើលឆ្វេងស្តាំអីនោះទេព្រោះរាន់ពេកទៅហើយ…ប៉ុន្តែនៅពេលស្រាតខោខ្វាក មុនទម្លាក់គូទលើចានបង្គន់ស្រាប់តែចេះរេភ្នែកមើលជុំវិញជាមុនសិនច្បាស់ម្ចាស់ថ្លៃ…ចុះអាបើកពពារមួយក្បាលនេះវង្វេងមក ពីណាបានជាមកអើតឆ្ងកនៅក្នុងចានបង្គន់ទៅវិញ!។ ពេកទៅហើយ.. ពស់វែកមួយក្បាលត្រូវបានប្រទះឃើញនៅក្នុងចានបង្គន់ នៅយានដ្ឋាន GM Service ក្នុងសង្កាត់ Nong Chok ទីក្រុងបាងកកប្រទេសថៃ។
លោក Adisak Thanomsil ជាម្ចាស់យានដ្ឋានបានឲ្យដឹងថា គាត់បានចូលទៅក្នុងបន្ទប់ទឹកប្រុងនឹងបត់ជើងធំ ហើយស្រាប់តែឃើញពស់វែកមួយក្បាលកំពុងសំងំក្នុងចានបង្គន់។ ឃើញដូច្នេះ គាត់ក៏ប្រញាប់ប្រញាល់ទាក់ទងទៅកាន់ក្រុមអ្នកជំនាញចាប់សត្វ ដើម្បីចាប់វាចេញ។ គួរឲ្យដឹងដែរថា បរិវេណជុំវិញយានដ្ឋាន សុទ្ធសឹងតែមានដើមឈើតូចធំ និងស្មៅដុះ ហើយតែងតែមានពស់វារចេញមកជាញឹកញាប់រហូតដល់ម្ចាស់យានដ្ឋានលែងខ្លាចទៅហើយ។
ជុំវិញរឿងរ៉ាវខាងលើនេះត្រូវបានបង្ហោះទៅលើបណ្ដាញសង្គម ដើម្បីជាការដាស់តឿនដល់មហាជនទាំងអស់ ឲ្យមានការប្រុងប្រយ័ត្នមុននឹងប្រើប្រាស់បន្ទប់ទឹក មិនថានៅផ្ទះផ្ទាល់ខ្លួន ឬសាធារណៈឡើយ៕
