...គួរឲ្យអស់សំណើចពេកហើយដែលតាៗមួយក្រុមសក់ក្បាលស្កូវសំព្រោងអស់ហើយនោះត្រូវប៉ូលិសបណ្តើរចូលក្នុងអង្គសវនាការតុលាការដើម្បីកាត់ទោសពីបទបង្កើតក្រុមអន្ធពាលអុកឡុកពួកអ្នកភូមិសូម្បីតែមន្ត្រីក្នុងមូលដ្ឋាន ក៏ញាក់សាច់ចំពោះក្រុមលោកតាសក់ស្កូវនេះដែរ។ “តាៗអន្ធពាល” មួយក្រុមនេះដែលមានអាយុជាមធ្យម ៧៩ ឆ្នាំត្រូវបានតុលាការប្រទេសចិនផ្ដន្ទាទោសឱ្យ ជាប់ពន្ធនាគារ បន្ទាប់ពីបង្កការភ័យខ្លាចនៅក្នុងភូមិមួយអស់រយៈពេលជិត ១៨ ឆ្នាំ។
តុលាការបានបញ្ជាក់ថា ពួកគេបានបង្កការភ័យខ្លាចនៅក្នុងសហគមន៍នៃខេត្តជាំងស៊ី ប្រទេសចិន ដោយធ្វើសកម្មភាពកំហែងទារប្រាក់ វាយដំជនស្លូតត្រង់ និងចាប់បង្ខាំងមនុស្ស ។ ជាច្រើនឆ្នាំមកនេះ ក្រុមសង្គមងងឹតដែលមានសមាជិក ១៩ នាក់នេះបានក្លាយជាក្រុម អន្ធពាលដ៏មានអំណាច ហើយសូម្បីតែមន្ត្រីក៏ត្រូវបង់ថ្លៃការពារឱ្យពួកគេដែរ។ ក្រុមអន្ធពាល សក់ស្កូវសំព្រោងនេះ ត្រូវបានប៉ូលិសនាំចូលស្ដាប់សវនាការជំនុំជម្រះទោសនៅតុលាការ ប្រជាជនស្រុកយូជាំង (Yujiang) កាលពីពេលកន្លងទៅនេះ។
សមាជិកក្រុមនេះជាប់ពិរុទ្ធភាពពីបទបង្កបញ្ហា កំហែងទារប្រាក់ លេងល្បែងស៊ីសង វាយតប់ និងវាយប្រហារលើអគាររដ្ឋ និងចាប់បង្ខាំង មនុស្សដោយខុសច្បាប់។ ពួកគេត្រូវបានតុលាការផ្តន្ទាទោសឱ្យជាប់ពន្ធនាគារទាំងអស់ ដោយមេដឹកនាំក្រុមជាប់ ពន្ធនាគារ ១៦ ឆ្នាំ៕
