…នៅប្រទេសថៃ…និងប្រទេសឥណ្ឌាដែលសំបូរទៅដោយសត្វពស់ ប្រជាពលរដ្ឋឧស្សាហ៍ជួបនូវហេតុការណ៍ភ័យស្ទើរលស់ព្រលឹងពីសកម្មភាពអាខ្លួនវែងលូនពីព្រៃមកសួរសុខទុក្ខដល់ក្នុងផ្ទះ។ស្ត្រីម្នាក់រស់នៅខេត្តឆាក់ឆើងសាវ ប្រទេសថៃ បានប្រទះឃើញពស់ថ្លាន់ដ៏ធំមួយក្បាលកំពុងវេននៅក្រោមគ្រែគេងរបស់កូនប្រុសអាយុ ១៣ឆ្នាំ បន្ទាប់ពីពស់នេះបានលបប្រហារឆ្មាក្នុងផ្ទះរហូតងាប់ដេកស្ដូក។ អ្នកស្រី Thanapoom Lekyen អាយុ ៤២ឆ្នាំ រៀបរាប់ថា ពស់ថ្លាន់នេះបានលបសសៀរតាមបង្អួចចូលផ្ទះដោយមិនមានអ្នកណាម្នាក់បានឃើញឡើយ។
គាត់បានឃើញឆ្មាចិញ្ចឹមមួយក្បាល បានដេកងាប់ក្រោមបង្អួចដោយមានស្នាមខាំជាច្រើនកន្លែង ហើយអ្នកស្រីបានដាក់ការសង្ស័យលើសត្វពស់។ គាត់និយាយថា “ខ្ញុំបានក្រោកពីគេងនៅពេលព្រឹក ហើយបានឃើញសត្វឆ្មាដេកងាប់គួរឲ្យភ្ញាក់ផ្អើល ធ្វើឲ្យខ្ញុំ និងកូនភិតភ័យយ៉ាងខ្លាំង ព្រោះគិតថា ប្រហែលមានពស់កាចសាហាវលួចចូលផ្ទះហើយ។ ខ្ញុំបានដើររកមើលជុំវិញផ្ទះ និងចូលទៅមើលក្នុងបន្ទប់គេងកូនប្រុស ស្រាប់តែឃើញអ្វីមួយលូនវារខ្មៅៗស្ទូរៗក្រោមគ្រែ ខ្ញុំបានស្រែកទាំងព្រលឹងចុងសក់។ ជាធម្មតា កូនប្រុសខ្ញុំគេងក្នុងបន្ទប់នេះ ប៉ុន្តែមហាសំណាង យប់កើតហេតុ កូនខ្ញុំឈ្មោះ Nong បានងងុយគេងខ្លាំងក៏គេងនៅបន្ទប់ជាមួយខ្ញុំតែម្ដង។ ខ្ញុំគិតថា កូនប្រុសខ្ញុំសំណាងខ្លាំងណាស់ ព្រោះមិនបានគេងនៅគ្រែលើពស់ថ្លាន់នៅយប់នោះ បើមិនអីចឹងទេ ប្រហែលកូនតូចគួរឲ្យស្រលាញ់របស់ខ្ញុំ អាចត្រូវពស់ខាំស្លាប់ក៏អាចថាបាន”។ បន្ទាប់ពីប្រទះឃើញពស់ថ្លាន់ អ្នកស្រី Lekyen បានទូរសព្ទហៅអ្នកជំនាញស្ម័គ្រចិត្តនៅអង្គភាព Chachoengsao Voluntary Rescue រួចគាត់ក៏បានមកដល់ភ្លាម។ ពួកគេបានចំណាយពេល ១៥នាទី ដើម្បីចាប់ពស់ប្រវែងជាង៣ម៉ែត្រមួយក្បាលនេះជាមួយដោយប្រើឧបករណ៍បំពង់ទុយោជ័រមានខ្សែទាក់ក។
យ៉ាងណា ពស់នេះហាក់កាចរឹងរូសធ្វើឲ្យអ្នកជំនាញពិបាកទប់ទល់ រហូតខាំដៃអ្នកជំនាញម្នាក់ តែត្រូវបន្តិចប៉ុណ្ណោះ។ ពួកគេបានចាប់ញាត់ក្នុងការុង រួចយកទៅលែងក្នុងព្រៃវិញដោយសុវត្ថិភាព៕
Home សង្គមប្លែកៗ អាខ្លួនវែងវង្វេងកើតរោគអផ្សុកមកឆ្ងាយរង្វេលក្រោមគ្រែ!ផ្អើលម្ចាស់ផ្ទះព្រលឹងចុងសក់!