…នៅប្រទេសឥណ្ឌាមានប្រជាពលរដ្ឋនៅតាមតំបន់ខ្លះប្រកាន់ខ្ជាប់នូវជំនឿដែលស្តាប់ទៅគួរឲ្យព្រឺរក្បាលបន្តិចហើយ។ តួយ៉ាងបុរសម្នាក់នេះដោយមានជំនឿស៊ប់ពេកបានឲ្យពួកអ្នកភូមិ កប់ខ្លួនក្នុងរណ្តៅវិះសូន្យសង្ខាចេះមានគេមកជួយ។ បុរសរូបនេះ ឈ្មោះ Deeraj Kharol រស់នៅក្នុង ភូមិ Karocho ka Kheda រដ្ឋ Rajasthan ប្រទេសឥណ្ឌា គាត់បានកប់ខ្លួនឯងនៅក្នុងពិធីបុណ្យសាសនាដ៏ចម្លែកមួយ ហើយគាត់ជឿថា ព្រះជាម្ចាស់នឹងជួយគាត់ឲ្យក្លាយជាព្រះដែររយៈពេល ៣ថ្ងៃបន្ទាប់។
អ្នកភូមិបានអបអរសាទរការសម្រេចចិត្តរបស់លោក Kharol ថែមទាំងជួយគ្រប់យ៉ាងដូចជាជីករណ្តៅ ទៀតផង។ កាលពីថ្ងៃពុធសប្ដាហ៍មុន ជាថ្ងៃដំបូងនៃពិធីបុណ្យ អ្នកភូមិបានកប់គាត់ចូលទៅក្នុងរណ្តៅតាមការណែនាំ។អ្នកភូមិជាច្រើននាក់ដែលនៅក្បែរៗនោះ បានប្រមូលផ្តុំគ្នាក្នុងពិធីដ៏ធំនេះ បន្ទាប់មកបានយកដុំថ្ម និងភក់កប់ជិត ក្រោយមកចាប់ផ្ដើមថ្វាយបង្គំនៅកន្លែងនោះ។ ជាសំណាងល្អ ដំណឹងធ្វើពិធីនេះ ត្រូវបានគេល្បីតៗគ្នានៅក្នុងសហគមន៍នោះយ៉ាងឆាប់រហ័ស ព្រមទាំងឮដល់សមត្ថកិច្ចប្រចាំតំបន់។ ក្រោយពីបានឭដំណឹងភ្លាម សមត្ថកិច្ចបានចុះធ្វើអន្តរាគមភ្លាមតែម្ដង។មន្ត្រីម្នាក់មានឈ្មោះ Mansingh Dev និងក្រុមការងារត្រូវបានគេរាយការណ៍ថា ពេលចុះទៅដល់កន្លែងកើតហេតុ ឃើញលោក Deeraj Kharol ត្រូវបានគេកប់តាំងពីម៉ោង២ព្រឹកព្រលឹម នៅថ្ងៃព្រហស្បតិ៍មានសភាពស្លេកស្លាំង ទន់ខ្លួន ប៉ុន្តែដំបូងពួកគេត្រូវបានអ្នកភូមិរារាំងមិនឲ្យចូលទៅក្បែរពិធីនោះឡើយ។បើយោងតាមសារព័ត៌មានឥណ្ឌា Time of India បានឲ្យដឹងថា មន្ត្រីប៉ូលិសបានបញ្ចុះបញ្ចូលចាស់ព្រឹទ្ធាចារ្យដែលមានវ័យចំណាស់នៅក្នុងភូមិថា បើកប់គាត់បែបនេះ គាត់នឹងអាចស្លាប់ដោយសារថប់ដង្ហើមជាក់ជាមិនខាន ហើយក្រោយមកគេបានអនុញ្ញាតអោយប៉ូលិសចូលដើម្បីធ្វើអន្តរាគមន៍ជួយសង្គ្រោះ។
លោក Kharol សឹងតែសន្លប់ ពេលដែលប៉ូលិសជីកយកចេញពីរណ្តៅ។ គាត់ត្រូវបានគេដឹកយកទៅកាន់មណ្ឌលសុខភាពដែលនៅក្បែរនោះ ហើយឥឡូវនេះគាត់មានស្ថានភាពល្អប្រសើរឡើងវិញហើយ។ ក្រោយមក គាត់បានប្រាប់ទៅកាន់ប៉ូលិសថា នេះជាបំណងប្រាថ្នាផ្ទាល់ខ្លួនរបស់គាត់ក្នុងការប្រតិបត្តិពិធីរបស់ព្រះ ហើយអ្នកភូមិបានជួយគាត់ មិនបានស្តីបន្ទោសគាត់នោះទេ។ គាត់បានអះអាងថា គាត់ចង់សម្រេចបានសេចក្តីសង្គ្រោះ ហើយមានគេណែនាំឲ្យឆ្លងកាត់ពិធីនេះសិន ដើម្បីទទួលអំណាចដ៏អស្ចារ្យពីព្រះ។