…ប្រពន្ធឡើងតុលាការ សុំលែងលះប្តីច្រើនតែស៊ូទ្រាំលែងបាននូវករណីដូចជា ប្តីប្រើអំពើហឹង្សា លួចលាក់មានស្រីថ្មី ឬក៏ខ្ជិលធ្វើការដេកចាំតែស៊ីក្រោមញើសឈាមរបស់ប្រពន្ធ...។ ដោយឡែកស្ត្រីឥណ្ឌាម្នាក់នេះបានធ្វើឲ្យមន្ត្រីតុលាការខ្ទប់សំណើចអត់ជាប់ព្រោះពាក្យលែងលះប្តីរបស់នាងប្លែកពីគេពេក ប្លែកត្រង់ថាប្តឹងលែងលះប្តីដោយសារតែប្តីកំជឹលអាំងផេះ១០ថ្ងៃងូតទឹកម្តង ក្លិនឡើងស្អុយគគ្រុកទោះពាក់ម៉ាស់ច្រើនជាន់ក៏ខ្យល់ដង្ហើមពិបាកទ្រាំដែរ។
តាមប្រភពព័ត៌មាន Oddity Central ស្ត្រីជនជាតិឥណ្ឌាអាយុ ២០ឆ្នាំម្នាក់នេះ បានដាក់ពាក្យសុំលែងលះ ប្តី ដោយអះអាងថា ប្តីស្អុយខ្លួនខ្លាំងពេកដល់ថ្នាក់ទ្រាំមិនបានស្ទើរតែដាច់ខ្យល់ដង្ហើម ព្រោះតែ១០ថ្ងៃបានងូតទឹកម្តង។ សូនី ទេវី ជាស្ត្រីម្នាក់មកពីស្រុកវីសាហាលីបានដាក់ពាក្យសុំលែងលះពីប្តីដោយផ្អែកលើហេតុផលថា ប្តីគាត់មិនបានរក្សាអនាម័យត្រឹមត្រូវនិងមិនមានសុជីវធម៌។ នាងបានប្រកែកថាការរៀបការជាមួយប្តីរបស់នាងដែលជាជាងឈើអាយុ ២៣ឆ្នាំ បានធ្វើឱ្យនាងអាម៉ាស់មុខនិងបានបំផ្លាញជីវិតរបស់នាង។ នៅក្នុងពាក្យសុំលែងលះ នាងទេវី បានសរសេរថា ប្តីរបស់នាងស្ទើរតែមិនដែលងូតទឹកឬដុសធ្មេញ ហើយមិនគោរពតាមវិន័យសង្គមណាមួយឡើយ។ នាងស្នើឱ្យតុលាការឱ្យនាងលែងប្តីបាន។នាងបាននិយាយថា៖ “ប្តីរបស់ខ្ញុំមានក្លិនស្អុយនៅពេលគាត់មិនងូតទឹកជិត១០ថ្ងៃ ។ លើសពីនេះទៅទៀតគាត់មិនដុសធ្មេញទេ។ គាត់ក៏មិនមានសុជីវធម៌ និងធ្វើតាមទម្លាប់ដែរ ។ ខ្ញុំមិនចង់រស់នៅជាមួយប្តីខ្ញុំទៀតទេ។ ខ្ញុំមិនអាចទ្រាំនឹងភាពអាម៉ាស់ទៀតទេ។ សូមឱ្យខ្ញុំចេញផុតពីបុរសម្នាក់នោះ ព្រោះគាត់កំពុងតែបំផ្លាញជីវិតរបស់ខ្ញុំហើយ។ យើងគ្មានកូនទេសូម្បីតែទំនាក់ទំនងរបស់យើងជាប្តីប្រពន្ធក៏មិនមានភាពរាក់ទាក់ដែរ។ ជីវិតគ្មានន័យទេ។ វាគ្មានតម្លៃអ្វីឡើយ» ។ ទោះជាយ៉ាងណាក៏ដោយ ការប៉ុនប៉ងលែងលះមួយនេះ មិនបានសម្រេចឡើយ ដោយសារតែសមាជិកនៃគណៈកម្មាធិការស្ត្រីប្រចាំនៅ (SWC) បានដកពាក្យនោះចេញវិញ។ ក្រោមហេតុផលចង់ឲ្យប្តីប្រពន្ធទាំងពីរ ធ្វើការសម្របសម្រួលជាមួយគ្នារយៈពេល២ខែសិន មុននឹងបញ្ជូនរឿងក្តីនេះទៅតុលាការ។
លោក Manish Ramជាប្តីរបស់នាងទេវី បានប្រាប់កាសែត Times of India ថា គាត់ចង់បន្តរស់នៅជាមួយប្រពន្ធរបស់គាត់ ហើយគាត់នឹងព្យាយាមឱ្យអស់ពីសមត្ថភាពដើម្បីធ្វើឱ្យរបៀបរស់នៅរបស់គាត់ប្រសើរឡើង មិនដូចពេលនេះ និងពេលកន្លងមក ៕
Home សង្គមប្លែកៗ កំពូលបុរសមហាខ្ជិល…១០ថ្ងៃងូតទឹកម្តង ប្រពន្ធឯណាទ្រាំហិតក្លិនស្អុយបាននោះ!