…នៅក្នុងសម័យជឿនលឿនដូចពេលបច្ចុប្បន្ននេះកាមេរ៉ាសុវត្ថិភាពបានបំពាក់ស្ទើរគ្រប់ច្រកល្ហកត្រង់កន្លែងអ៊ូអរដ៏មមាញឹក ដូច្នេះអ្វីទាំងឡាយបានកើតឡើងនៅត្រូវកន្លែងទាំងអស់នោះបានកត់ត្រាឲ្យឃើញពីរូបភាពទាំងអស់គ្មានអ្វីប្រកែកបាននោះឡើយ។ចំពោះរូបភាពមួយនេះបានទទួលរងនូវការរិះគន់ និងខឹងសម្បាយ៉ាងខ្លាំង ពីសំណាក់មហាជនលើបណ្តាញសង្គម ក្រោយវីដេអូឃ្លីបស្ត្រីជាម្តាយជនជាតិចិនម្នាក់ បានប្រើល្បិចរកលុយ ដោយធ្វើជារុញកូនប្រុសចូលឡាន ខណៈដែលខ្លួនឯងវិញ ធ្វើជាដេកប្រកាច់ប្រកិន ដើម្បីចង់ចោទថាគេបើកបុក ហើយទាមទារថ្លៃសំណង។
ហេតុការណ៍នេះ បានកើតឡើងកាលពីសប្តាហ៍មុននេះ នៅឯចំណតរថយន្តមួយកន្លែង ស្ថិតក្នុងទីក្រុង Guangzhou ខេត្ត Guangdong ប្រទេសចិន។ផ្អែកតាមរយៈវីដេអូឃ្លីប ថតជាប់ដោយកាមេរ៉ាសុវត្ថិភាព នៅក្នុងថ្ងៃកើតហេតុ ដែលមិនអាចប្រកែកបាននោះ បានបង្ហាញយ៉ាងច្បាស់ ពីសកម្មភាពរបស់ស្ត្រីជាម្តាយ រួមទាំងកូនប្រុសម្នាក់ កំពុងតែឈររេរារង់ចាំឱកាសល្អ ដើម្បីប្រើល្បិចរកលុយ។មិនយូរប៉ុន្មាន ស្រាប់តែមានរថយន្តមួយគ្រឿងបានបើកចូលចំណត ហើយភ្លាមៗនោះ ស្ត្រីជាម្តាយខាងលើនេះ ក៏បានស្ទុះទៅរុញកូនប្រុសខ្លួនឯងចូលឡាន ក្នុងគោលបំណងចង់ចោទថា ឡានមួយគ្រឿងនោះបើកបុកកូននាង។ផ្ទុយទៅវិញ ផែនការណ៍ហាក់មិនរលូន ក្រោយអ្នកបើកបរបានជាន់ហ្វ្រាំងឈប់ទាន់ ហើយភ្លាមៗនោះ ស្ត្រីជាម្តាយខាងលើ ក៏បានរត់ទៅដេកននៀលដី ធ្វើជាប្រកាច់ប្រកិននៅមុខឡានវិញម្តង ប៉ុន្តែត្រូវបានរថយន្តបើកថយក្រោយវិញ។ក្នុងហេតុការណ៍នោះដែរ គេក៏ឃើញមានបុរសជាអ្នកដឹកជញ្ជូនអាហារម្នាក់ ដែលឈរនៅក្បែរនោះ បានចូលទៅទាញដៃក្មេងប្រុសតូច ជាកូនស្ត្រីជាម្តាយខាងលើ ឲ្យចេញឆ្ងាយផងដែរ។យ៉ាងណាមិញ បើទោះបីជាខំប្រឹងយ៉ាងណាក្តី នៅទីបំផុតវិធីសាស្ត្ររកលុយមិនស្គាល់ស្លាប់ របស់ស្ត្រីជាម្តាយ និងកូនប្រុសខាងលើនេះ នៅតែមិនអាចសម្រេច ហើយថែមទាំងត្រូវបានគេរិះគន់យ៉ាងចាស់ថែមទៀតផង។
គួរឲ្យដឹងផងដែរថា នេះមិនមែនជាលើកទីមួយទេ ដែលមានករណីបែបនេះកើតឡើង។ ព្រោះកន្លងមក វិធីសាស្ត្ររកលុយដ៏គ្រោះថ្នាក់នេះ ត្រូវបានគេដឹងថា មានជនជាតិចិនចិនក្រីក្រ និងខ្វះការពិចារណាមួយចំនួនតូច បានធ្វើសកម្មភាពបែបនេះ ទាំងប្រថុយជីវិតតាមដងផ្លូវ រត់ចូលឡានស្រស់ៗ (ឡានកំពុងបើកលើផ្លូវ) ខ្លះធ្វើជារត់ទៅដេកក្រោមឡាន ខ្លះរត់ទៅបោកក្បាល បោកខ្លួនបោកប្រាណនឹងឡានគេ ដើម្បីជាការចោទប្រកាន់ និងទាមទារសំណងពីអ្នកបើកបរ ខណៈក៏មានអ្នកខ្លះបានរងរបួស ខ្លះបានស្លាប់បាត់បង់ជីវិតមែនទែន ព្រោះតែព្រហើនចង់បានលុយមិនខ្លាចស្លាប់នេះផងដែរ ៕
