ក្រុមអ្នកស្រាវជ្រាវអន្តរជាតិមួយក្រុម បានប្រកាសនៅថ្ងៃចន្ទនេះថា ពួកគេបានរកឃើញហ្វូស៊ីលរោមស្លាបរបស់បក្សីមួយប្រភេទ ដ៏ធំខុសពីធម្មតា ដែលត្រូវបានគេគណនាថា មានអាយុកាល ៩៩ លានឆ្នាំមកហើយ។ សន្លឹករោមស្លាបបក្សីនេះត្រូវបានរកឃើញនៅជ្រលង Hukawng នៃភាគខាងជើងប្រទេសមីយ៉ាន់ម៉ា ដែលជាទីកន្លែងត្រូវបានក្រុមអ្នកវិទ្យាសាស្ត្រអះអាងថា សម្បូរទៅដោយហ្វូស៊ីលសត្វជាច្រើនប្រភេទ ដែលធ្លាប់មានវត្តមានលើផែនដី កាលពីរាប់រយលានឆ្នាំមុន។
យោងតាមអ្នកស្រាវជ្រាវមួយរូបឈ្មោះ ហ្ស៊ីង លីដា (Xing Lida) មកពីសាកលវិទ្យាល័យភូមិសាស្ត្រ និងវិទ្យាសាស្ត្រចិនបានលើកឡើងថា លទ្ធផលខាងលើនេះ នឹងជួយយើងឲ្យស្វែងយល់កាន់តែច្បាស់ អំពីទំហំនៃសត្វបក្សីកាលពីសម័យមុន ឬសម័យដាយណូស័រ។ សន្លឹកស្លាបបក្សីខាងលើនេះមានប្រវែង ៥.៣សង់ទីម៉ែត្រ និងមានទម្ងន់ ៧៩.៤ក្រាម ដែលវាទំនងជាស្ថិតនៅក្នុងអំបូរសត្វបក្សី ដែលបានផុតពូជ កាលពីអំឡុងយុគសម័យ Cretaceous (១៤៥ ដល់ ៦៦លានឆ្នាំមុន)។
គួរបញ្ជាក់ថា រោមស្លាបមួយចំនួនទៀតរបស់សត្វបក្សី ក៏ត្រូវបានរកឃើញនៅទីតាំងខាងលើនេះដែរដោយខ្លះមានប្រវែង ៣៧មីលីម៉ែត្រ។ ការអះអាងថា វាជាសត្វបក្សីមានទំហំធំនោះ គឺដោយសារតែការយោងទៅលើទំហំរោមស្លាបរបស់វា ធំខុសពីធម្មតា។ បច្ចុប្បន្នការស្រាវជ្រាវកំពុងតែត្រូវបានធ្វើឡើងជាបន្តទៀត ដើម្បីស្វែងយល់ឲ្យកាន់តែច្បាស់អំពីប្រភេទសត្វបក្សីខាងលើ ព្រមទាំងទំហំតួខ្លួនពិតប្រាកដរបស់វា៕
