…នេះបានចំជាហៅថា ខឹងគោវ៉ៃរទេះមែន ដែលស្ត្រីជាម្តាយម្នាក់នេះខឹងឈ្លោះគេមិនឈ្នះមកបែរជាជះភ្លើងកំហឹងដាក់ទៅលើកូនប្រុស ដោយចាប់កូនបោះដូចបាល់ទៅក្នុងទឹកប្រឡាយ…។ជារឿងដ៏គួរឲ្យហួសចិត្តជាទីបំផុត ដែលស្ត្រីជាម្តាយជនជាតិចិនម្នាក់នេះ ឈរឈ្លោះគ្នាសុខៗ ស្រាប់តែចាប់អូសដៃកូនប្រុស បោះទម្លាក់ទឹកប្រឡាយ ដូចសត្វធាតុ បានរងការរិះគន់យ៉ាងខ្លាំង នៅលើបណ្តាញសង្គម ក្រោយវីដេអូឃ្លីប ត្រូវបានបង្ហោះចែកចាយ។
តាមរយៈវីដេអូឃ្លីបក្នុងថ្ងៃកើតហេតុ បានបង្ហាញយ៉ាងច្បាស់ ពីសកម្មភាពរបស់ស្ត្រីមួយក្រុម ដែលមិនត្រូវបានគេស្គាល់អត្តសញ្ញាណ ឈរជជែក តឹងសរសៃ.កដាក់គ្នា រហូតធ្វើឲ្យស្ត្រីជាម្តាយម្នាក់ ឈានដល់ការអូសដៃកូនប្រុសតូចរបស់ខ្លួន ដែលកំពុងតែស្រែកយំ បោះទម្លាក់ចូលទៅក្នុងទឹកប្រឡាយ ដែលនៅក្បែរនោះតែម្តង។ភ្លាមៗក្រោយកើតហេតុ គេក៏ឃើញមានស្ត្រីម្នាក់ ក្នុងចំណោមនោះ បានស្ទុះទៅជួយលើកកុមារាតូចរងគ្រោះចេញពីទឹក ខណៈឯស្ត្រីម្នាក់ទៀត មិនដឹងចេញមកពីណាទេ ស្លៀកពាក់ឈុតខ្មៅ ក៏បានស្ទុះទៅវាយតប់ ទះកំផ្លៀង ទៅលើស្ត្រីជាម្តាយដៃដល់ ដែលធ្វើអាក្រក់ទៅលើកូនប្រុសខ្លួនឯងនោះផងដែរ។តាមរយៈវីដេអូឃ្លីបនោះទៀតសោត គេឃើញថា ក្បាលរបស់កុមាររងគ្រោះ បានបោកប៉ះជាមួយនឹងផ្ទាំងថ្មបេតុងខាងក្រោម ដែលធ្វើឲ្យអ្នកទស្សនាវីដេអូឃ្លីបនេះហើយ មានការព្រួយបារម្ភយ៉ាងខ្លាំង ទៅលើសុវត្ថិភាពរបស់គេ។
ក្នុងឃ្លីបវីដេអូនេះ ប៉ូលិសក៏បានបញ្ជាក់ដែរថា ស្ត្រីជាម្តាយរូបនោះ បានព្យាយាមប៉ុនប៉ងលើកបោះកូនខ្លួនឯងចូលទឹក ជាច្រើនលើកច្រើនសា រហូតទាល់តែសម្រេច ដែលធ្វើឲ្យខ្នង និងក្បាលរបស់កុមារារងគ្រោះ បុកនឹងផ្ទាំងថ្មបេតុង៕
