[wai id="5"]
…ពិតជានៅមានស្មារតីរឹងប៉ឹងគួរឲ្យកោតសរសើរណាស់ បើទោះបីជាអាយុសង្ខាកំពុងស្ថិតនៅលើមាត់ជ្រោះក្តីតែអត់តក់ស្លុតនៅបានផ្តាំឲ្យបរិច្ចាកសរីរាង្គរបស់ខ្លួនជួយសង្គ្រោះជីវិតម្តាយ…។ កាលពីអាយុ ៥ឆ្នាំ ក្មេងប្រុសជនជាតិចិន ឈ្មោះ Chen Xiaotian ត្រូវក្រុមគ្រូពេទ្យ រកឃើញ ជំងឺដុះដុំសាច់ក្នុងខួរក្បាល។ ហើយក្រោយមក ម្តាយរបស់គេ គឺអ្នកស្រី Zhou Lou មានវ័យ ៣៤ ឆ្នាំ ស្រាប់តែកើតជំងឺតម្រងនោមទៀត ធ្វើឲ្យទាំងម្តាយទាំងកូន ជួបទុក្ខផ្ទួនៗ និងគួរឲ្យអាណិតយ៉ាងខ្លាំង។
ពាណិជ្ជកម្ម
អស់រយៈពេលប្រមាណពីរឆ្នាំ កន្លងផុតទៅ អាការរបស់ក្មេងប្រុស Chen កាន់តែយ៉ាប់យ៉ឺនទៅ រហូតជំងឺមហារីកបានរីករាលដាលពេញខួរក្បាលរបស់គេ បណ្តាលឲ្យគេត្រូវពិការភ្នែកទាំងសងខាង។អ្នកស្រី Lu Yuanxiu មានវ័យ ៥៧ ឆ្នាំ ត្រូវជា ជីដូនបានមានប្រសាសន៍ថា “ គ្រូពេទ្យប្រាប់ខ្ញុំថា ចៅប្រុសរបស់ខ្ញុំ មិនរស់ទេ ប៉ុន្តែក្រលៀនរបស់គេ អាចយកមកជួយអ្នកម្តាយដែលឈឺ ព្រមទាំងជួយអ្នកជំងឺពីរនាក់ផ្សេងទៀត។” អ្នកស្រីបានបន្តថា អ្នកស្រីធ្លាប់បានយករឿងនេះ មកពិភាក្សាជាមួយ កូនស្រីរបស់គាត់ដែរ តែនាងពិតជាមិនដាច់ចិត្ត ហើយមិនចង់ស្តាប់ចង់ដឹងអ្វីទាំងអស់។ យ៉ាងណាមិញ កុមារា Chen បានដឹងឮអំពីរឿងនេះ និងទទូចសុំ ឲ្យក្រុមគ្រូពេទ្យវះកាត់យកក្រលៀនរបស់គេចេញ ដើម្បីជួយសង្គ្រោះជីវិតម្តាយ។មួយរយៈពេលក្រោយមក ក្មេងប្រុសម្នាក់នេះ បានទទួលមរណភាព ហើយក្រោយពេលស្លាប់ ក្រលៀន និងថ្លើម របស់កុមារាម្នាក់នេះ ត្រូវបានក្រុមគ្រូពេទ្យ យកមកជួយ អ្នកស្រី Zhou ព្រមទាំងមនុស្សពីរនាក់ផ្សេងទៀត។អ្នកនាំពាក្យម្នាក់នៃមន្ទីរពេទ្យ មានឈ្មោះ Yi Tai បានឲ្យដឹងថា ខាងគ្រូពេទ្យ បានឧទ្ទិសកុសលដល់ក្មេងប្រុសគួរឲ្យអាណិតម្នាក់នេះ ដែលការស្លាប់របស់គេ បានស្រោចស្រង់ជីវិតមនុស្សបីនាក់ផ្សេងទៀត បានយ៉ាងជោគជ័យ៕