[wai id="6"]
...ចង់ចំណេញដាច់ចំណងមែន នៅប្រទេសកម្ពុជាយើងនេះអត់មានកើតឡើងនូវករណីវីរ៉ុសកូរ៉ូណានោះទេ ហើយប្រជាពលរដ្ឋទាំងឡាយក៏ពុំបានខ្វាយខ្វល់ព្រួយបារម្មណ៍ពីជម្ងឺមួយនេះដែរ។ ប៉ុន្តែផ្ទុយទៅវិញបែជាមានបុគ្គលខ្លះបោះទុនទិញម៉ាស់ដើមឆក់ឱកាសលក់យកចំណេញ។ បែជាមិនបានចំណេញទៅជាដាច់ចំណងទៅវិញ!។ នារីម្នាក់ត្រូវប៉ូលិសចាប់ខ្លួនពាក់ព័ន្ធករណីលក់ម៉ាសពាក់ការពារ ដែលមានតម្លៃរហូតដល់ជាងបួនម៉ឺនដុល្លារ។ ការចាប់ខ្លួននេះ បានធ្វើឡើងបន្ទាប់ពីនារីរូបនោះយកលុយពីជនរងគ្រោះហើយ ប៉ុន្តែមិនមានម៉ាសគ្រប់ចំនួន និងថែមទាំងបានរត់គេច តែត្រូវជនរងគ្រោះតាមរកឃើញចាប់ប្រគល់ឲ្យសមត្ថកិច្ច។ជនសង្ស័យឈ្មោះ អ៊ឹង ហ្គិចហួង អាយុ២១ឆ្នាំ ត្រូវបានជនរងគ្រោះចាប់យកមកប្រគល់ឲ្យសមត្ថកិច្ចកាលពីថ្ងៃទី២២ ខែកុម្ភៈ ហើយត្រូវបានបញ្ជូនទៅតុលាការនៅថ្ងៃទី២៤ ខែកុម្ភៈ ឆ្នាំ២០២០ ដើម្បីចាត់ការតាមនីតិវិធី។
ពាណិជ្ជកម្ម
លោកវរសេនីយ៍ទោ ឡេង ប៊ុនហួរ នាយរងការិយាល័យព្រហ្មទណ្ឌកម្រិតស្រាលនៃនាយកដ្ឋាននគរបាលព្រហ្មទណ្ឌក្រសួងមហាផ្ទៃ បានប្រាប់ថា រឿងរ៉ាវយកលុយហើយតែអត់ម៉ាស់ឲ្យ មានជនរងគ្រោះចំនួនប្រាំមួយនាក់ ។ លោកវរសេនីយ៍ទោ ឡេង ប៊ុនហួរ បានបញ្ជាក់ថា “ជនរងគ្រោះបានប្តឹងស្ត្រីរូបនោះពីបទឆបោក ដោយស្ត្រីរូបនោះគាត់បានយកលុយពីជនរងគ្រោះដើម្បីទិញម៉ាស (ម៉ាសពាក់ការពារ) ប៉ុន្តែអត់មានម៉ាសឲ្យគេ។ ជនសង្ស័យបានបង្កើតគណនីហ្វេសប៊ុកចំនួនបី ដើម្បីឆបោកគេ ដោយបានដើរតួជាម្ចាស់ម៉ាស និងថាខ្លួនមានម៉ាសលក់ ហើយឲ្យជនរងគ្រោះផ្ញើលុយឲ្យតាមវីង បន្ទាប់ពីទទួលបានលុយហើយ ស្ត្រីរូបនោះបានគេចខ្លួន។ ប៉ុន្តែដោយជនរងគ្រោះតាមរកឃើញក៏បានឃាត់ខ្លួនយកមកប្រគល់ឲ្យខាងខ្ញុំ ឃាត់ខ្លួនកាលពីថ្ងៃទី២២ ខែកុម្ភៈ”។
លោកបានបន្តថា ជនរងគ្រោះមានចំនួនប្រាំមួយនាក់ ទឹកប្រាក់ដែលបោកមានជាងបួនម៉ឺនប្រាំពាន់ដុល្លារ៕