[wai id="5"]
[wai id="7"]
នៅថ្ងៃទី២៨ ខែកុម្ភៈ ឆ្នាំ២០២០នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានណែនាំ ឲ្យក្រសួង ធម្មការ និងសាសនា ក៏ដូចជាមន្ត្រីសង្ឃទូទាំងប្រទេស ត្រូវពិនិត្យឡើងវិញ លើករណី ព្រះសង្ឃមួយចំនួន ដែលទេសនាបែបកំប្លុកកំប្លែង ដើម្បីទាក់ទាញចំណាប់អារម្មណ៍ ពីពុទ្ធបរិស័ទព្រោះព្រះសង្ឃ មានតួនាទី អប់រំពុទ្ធបរិស័ទ ឲ្យចូលរួមការពារ ជាតិ សាសនា ព្រះមហាក្សត្រ ជាពិសេសចូលរួមថែរក្សាសន្តិភាព ។ថ្លែងបែបនេះ នៅក្នុងពិធីស្រោចស្រពព្រះសុគន្ធវារី ប្រគេនសម្តេចព្រះសង្ឃនាយករង៣ព្រះអង្គ ។
ពាណិជ្ជកម្ម
សម្ដេចតេជោ ក៏មិនហ៊ានវាយតម្លៃថា ការទេសនាបែបនេះ ខុសឆ្គងដែលនាំឱ្យប៉ះពាល់ដល់វិស័យសាសនាដែរ ប៉ុន្តែសម្ដេច គ្រាន់តែមិនចង់ឃើញការយកសាសនា ទៅលាយឡំជាមួយកំប្លែង និងចម្រៀងប៉ុណ្ណោះ នៅពេលទេសនា។ សម្តេចបានបន្តទៀតថា ដើម្បីឱ្យពលរដ្ឋមានជំនឿ និងប្រកាន់ខ្ជាប់នូវសាសនានោះ គឺអាស្រ័យលើអ្នកអប់រំសាសនាតែម្ដង។ «យើងមិនអាចបន្ទោសប្រជាពលរដ្ឋបានទេ បញ្ហាស្ថិតនៅត្រង់ថា ព្រះពុទ្ធសាសនា ផ្ដល់នូវជំនឿជឿជាក់ដល់ប្រជាជាតិឬអត់?...»។
សម្ដេចតេជោ គូសបញ្ជាក់ថា «តាស៊ុចទេសនាកំប្លុកកំប្លែងហ្នឹង ខ្ញុំព្រះករុណាខ្ញុំចេះតែចង់សួរថា ត្រឹមត្រូវ ឬអត់ ហើយបើមិនត្រូវទេដល់ពេល អនុសង្ឃវចរៈ គឺលេងតែម្ដងទៅ ដល់ពេលចាប់ផ្ដើមសម្ដែងធម្មទេសនា ក៏ច្រៀងតាមចឹងទៅ ចាបយំល្លើយៗ ព្រះសង្ឃខ្លះក៏ទេសនា តាមរបៀបកំប្លែងទៅ ហើយពុទ្ធបរិស័ទ ក៏ចេះតែសើចសប្បាយ ដល់ចឹងទៅជាដណ្ដើមការងារ ព្រហ្ម ម៉ាញអស់ទៅ ចឹងទេក៏គិតទៅដល់ពេល អនុសង្ឃវចរៈ មន្ត្រីសង្ឃទូទាំងប្រទេស ក៏គួរតែត្រូវពិនិត្យកែលម្អកន្លែងហ្នឹង ក្រសួងធម្មការក៏ត្រូវពិនិត្យថា តើត្រូវនឹងបែបបទព្រះពុទ្ធសាសនា ឬអត់ បើឡើងគ្រែទេសនា ហាក់ដូចជាឡើងគ្រែកំប្លែង ខ្ញុំមិនហ៊ានថាម៉េចទេ ទុកព្រះសង្ឃបកស្រាយទៅចុះ» ៕
[wai id="6"]
