[wai id="5"]
[wai id="7"]
នាយុគសម័យឌីជីថលនេះ ព័ត៌មានក្លែងក្លាយ ឬ Fake News បានក្លាយជាប្រធានបទក្តៅគគុកមួយ និងមានការជជែកដេញដោលច្រើននៅក្នុងចំណោមអ្នកជំនាញសារព័ត៌មានក៏ដូចជាពលរដ្ឋទូទៅក្នុងពិភពលោក។ សម្រាប់កម្ពុជា ដែលជាប្រទេសកំពុងអភិវឌ្ឍន៍ ព័ត៌មានក្លែងក្លាយត្រូវបានប្រើជាមធ្យោបាយមួយដើម្បីជះឥទ្ធិពលទៅលើផ្នត់គំនិតនិងការសម្រេចចិត្តរបស់ពលរដ្ឋទៅតាមទិដ្ឋភាពផ្សេងៗ ដែលពិសេសថ្មីៗនេះក្រុមបំពុលសង្គមមួយចំនួនបានឆ្លៀតឳកាសបង្កើតព័ត៌មាននានា ទាក់ទងនឹងវីរុស Covid-19 ដើម្បីបំភ័យប្រជាពលរដ្ឋនឹងបានជិះឥទ្ធិពលយ៉ាងខ្លាំងដល់សុខភាពផ្លូវចិត្តផងដែរ ។
ពាណិជ្ជកម្ម
អ្នកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យរបស់ក្រសួងសុខាភិបាល «ប្រសិនបើក្នុងជីវិតប្រចាំថ្ងៃរបស់យើង យើងចំណាយពេល២ម៉ោងសម្រាប់មើលតែរឿងរន្ធត់ តក់ស្លុតភ័យខ្លាច...ធ្វើឲ្យអ្នកនោះមានបញ្ហាផ្លូវចិត្តក្នុងរយៈពេល២សប្តាហ៍ក្រោយ។ អ៊ីចឹង សូមបងប្អូនរបស់យើងកុំព្យាយាមមើលព័ត៌មានណាដែលតក់ស្លុតព័ត៌មានណាដែលរន្ធត់ ឬ ព័ត៌មានក្លែងក្លាយ (ដែលមានចេតនាធ្វើឲ្យភ័យខ្លាច) ដោយយើងត្រូវប្រឹងស្រាវជ្រាវរកប្រភពព័ត៌មានណា ដែលអាចជឿទុកចិត្តបាន»។ ការថ្លែងបែបនេះក្នុងកម្មវិធីស្តីពី COVID-19 និងព័ត៌មានក្លែងក្លាយ កាលពីថ្ងៃទី១១ ខែមីនា ឆ្នាំ២០២០ ។
អ្នកស្រី ឱ វណ្ណឌីន បានអះអាងថា មានព័ត៌មាន និងអ្នកប្រើប្រាស់សង្គមហ្វេសប៊ុក បានសរសសេរ និងចុះផ្សាយពីករណីពលរដ្ឋដួលសន្លប់ គឺដោយសារតែមេរោគ COVID-19 ដែលធ្វើពលរដ្ឋភ័យខ្លាច តក់ស្លុត និងរន្ធត់ មិនហ៊ានជួយដល់សន្លប់ទាំងនោះ ធ្វើឲ្យបាត់បង់គុណធម៌សង្គម គឺជាព័ត៌មានក្លែងក្លាយ ឬមិនពិត។
គួររម្លឹកដែរថាថ្មីៗនេះ ក្រសួងព័ត៌មាន សម្រេចបង្កើតគណៈកម្មការតាមដានការផ្សព្វផ្សាយព័ត៌មានក្លែងក្លាយតាមប្រព័ន្ធផ្សព្វផ្សាយ និងតាមបណ្តាញទំនាក់ទំនងសង្គមនានានៅព្រះរាជាណាចក្រកម្ពុជា ដើម្បីរាំងខ្ទប់ព័ត៌មានក្លែងក្លាយដែលធ្វើឱ្យខូចសណ្តាប់ធ្នាប់សង្គម និងធ្វើឪ្យចលាចលនៅក្នុងសង្គម។គណៈកម្មការតាមដាន ការផ្សព្វផ្សាយព័ត៌មានក្លែងក្លាយ មានប្រធាន អនុប្រធាន និងសមាជិកចំនួន ២៣រូប៕
[wai id="6"]
