ចាប់តាំងពីការផ្ទុះឡើង នៃវីរុសកូវីដ-១៩ កាលពីអំឡុងខែធ្នូ ឆ្នាំ២០១៩ នៅទីក្រុងវូហាន ខេត្ដហ៊ូប៉ី ប្រទេសចិន រហូតមកដល់ព្រឹក ថ្ងៃទី២៤ ខែមីនា ឆ្នាំ២០២០នេះ នៅលើពិភពលោក មានអ្នកឆ្លងកើនឡើង ៣៧៥៤៣៨នាក់ ក្នុងនោះស្លាប់១៦៣៦៥នាក់ និងព្យាបាលជាសះស្បើយ ១០១៥៨៤នាក់។
ប្រទេសចិនជាទីផ្ទុះឡើង នៃវីរុសដ៏កាចសាហាវនេះ មានអ្នកឆ្លងជាង៨ម៉ឺននាក់ ហើយក្នុងចំណោមអ្នកជំងឺទាំងនោះ ស្លាប់៣២៧០នាក់ និងជាសះស្បើយ ជាង៧២០០០នាក់។ ប៉ុន្ដែរហូតមកដល់ពេលនេះ ចិនបានគ្រប់គ្រងស្ថានការណ៍ជាបណ្ដោះអាសន្នទាំងស្រុង។
ផ្ទុយទៅវិញ បណ្ដាប្រទេសនៅអឺរ៉ុបក៏កំពុងតែវឹកវរនឹងការរាតត្បាត នៃវីរុសកូវីដ-១៩នេះ ហើយអ៊ីតាលី ក្លាយជាប្រទេសរងគ្រោះខ្លាំងជាងគេបំផុត នៅតំបន់អឺរ៉ុប និងឈរលំដាប់លេខ២ នៃចំនួនអ្នកឆ្លងវីរុស ច្រើន ជាងគេ បន្ទាប់ពីប្រទេសចិន។ អ៊ីតាលីមានអ្នកឆ្លងវីរុសកូវីដ-កើនឡើង រហូតដល់ទៅ៦៣៩២៧នាក់ ដោយឆ្លងថ្មីចំនួន៤៧៨៩នាក់។ ក្នុងចំណោមអ្នកជំងឺជាង៦ម៉ឺននាក់នោះ គឺព្យាបាលបានជាសះស្បើយចំនួន ៧៤៣២នាក់ និងស្លាប់៦០៧៧នាក់។
បើយោងតាមរបាយការណ៍ បានឲ្យដឹងថា ក្នុងមួយថ្ងៃៗ ចំនួនអ្នកស្លាប់កើនឡើងជាង៦០០នាក់នេះ។ នេះជាតួលេខមួយគួរឲ្យភ័យខ្លាច និងព្រួយបារម្ភបំផុត។ ដោយឡែកប្រទេសមហាអំណាចយោធា និងសេដ្ឋកិច្ចលេខ១របស់ពិភពលោកវិញ (អាមេរិក) បានឈរក្នុងលំដាប់លេខ៣ នៃចំនួនអ្នកឆ្លងវីរុសដ៏កាចសាហាវច្រើនជាងគេ បន្ទាប់ពីអ៊ីតាលី។ អាមេរិកមានអ្នកឆ្លងវីរុសនេះ ចំនួន៤២៩៦៤នាក់។ ក្នុងចំណោមអ្នកជំងឺទាំងនោះ គឺស្លាប់៥២៦នាក់ និងព្យាបាលជាសះស្បើយចំនួន២៩៥នាក់។
ដោយសារតែអាមេរិកបានដឹងច្បាស់ថា វីរុសដ៏កាចសាហាវនេះកំពុងតែរាតត្បាត នៅលើទឹកដីរបស់ខ្លួននោះ ទើបប្រធានាធិបតីអាមេរិក លោក ដូណាល់ ត្រាំ បានស្វះស្វែងរកកញ្ចប់លុយ រហូតដល់១០០០ពាន់លានដុល្លារអាមេរិក សម្រាប់ធ្វើសង្រ្គាមប្រឆាំងនឹងវីរុសដ៏កាចសាហាវនេះ៕