[wai id="9"]
នាព្រឹកថ្ងៃទី៥មីនានេះ រដ្ឋសភាបានអនុម័តសេចក្តីព្រាងច្បាប់ស្តីពី«វិធានការទប់ស្កាត់ការឆ្លងរាល ដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សងទៀត» ដែលមាន១៨មាត្រា។
ការបង្កើតច្បាប់ថ្មី ដែលនឹងឈានដល់មានការដាក់ទោសទណ្ឌផងនោះ លោក ហ៊ុន ម៉ានី តំណាងរាស្ត្រមណ្ឌល កំពង់ស្ពឺ និងជាប្រធានគណៈកម្មការទី៧ នៃរដ្ឋសភា បានបង្ហាញឆន្ទៈគាំទ្រយ៉ាងខ្លាំង។ តាមរយៈ Facebook ផ្លូវការ, លោក ហ៊ុន ម៉ានី បានកោតសរសើររាជរដ្ឋាភិបាលកម្ពុជា ដែលកន្លងមកប្រើប្រាស់ត្រឹមអនុក្រឹត្យ និងលិខិតរដ្ឋបាលផ្សេងៗទៀត ដើម្បីគ្រប់គ្រងស្ថានការណ៍កូវីដ-១៩ បានយ៉ាងល្អប្រសើរទាំង ក្នុងព្រឹត្តិការណ៍សហគមន៍ ៣វិច្ឆិកា និងព្រឹត្តិការណ៍សហគមន៍ ២៨វិច្ឆិកា។
ទោះជាយ៉ាងនេះក្តី តំណាងរាស្ត្ររូបនេះ អះអាងថា ព្រឹត្តិការណ៍សហគមន៍ ២០កុម្ភៈ គឺជាឧទាហរណ៍មួយ ដែលពិបាកគ្រប់គ្រងស្ថានការណ៍ ព្រោះវាមានលក្ខណៈរីករាលដាលធ្ងន់ធ្ងរ ហើយមនុស្សមួយចំនួនបំពាន វិធានការរាជរដ្ឋាភិបាល។ លោកថ្លែងថា មានតែការបង្កើតច្បាប់ទេ ទើបជាយន្តការល្អ ដើម្បីជួយសម្រួលដល់ការបង្ការនៃការរីករាលដាលជំងឺកូវីដ-១៩ ឬជំងឺឆ្លងកាចសាហាវផ្សេងៗទៀត។
ពាណិជ្ជកម្ម
លោក ហ៊ុន ម៉ានី បានបញ្ជាក់យ៉ាងដូច្នេះថា៖ «នាពេលកន្លងមក ពេលសភាពការណ៍តម្រូវម្តងៗ រាជរដ្ឋាភិបាលបានអនុវត្តវិធានការគ្រប់គ្រងដោយត្រឹមត្រូវ ហ្មត់ចត់ រហូតជោគជ័យក្នុងការបង្ការការរីករាល ដាលនៃជំងឺកូវីដ-១៩ នៅកម្ពុជា ជាពិសេសពាក់ព័ន្ធព្រឹត្តិការណ៍សហគមន៍ ៣វិច្ឆិកា និង២៨វិច្ឆិកា ហើយនៅពេលស្ថានភាពអាចគ្រប់គ្រងបាន វិធានការនានាមិនត្រូវបានរឹតបន្តឹងខ្លាំងពេកដើម្បីធានាជីវភាពប្រចាំថ្ងៃ របស់ប្រជាជន។ ក្នុងន័យនេះហើយ ដែលស្ថានភាពពេលនេះ ចំពោះព្រឹត្តិការណ៍ ២០កុម្ភៈ គឺស្ថានភាពចាំបាច់តម្រូវ ឲ្យមានវិធានការកាន់តែហ្មត់ចត់»។
លោកបន្តថា «កន្លងមក យើងសង្កេតឃើញមានការមិនគោរពវិធានការ មានជាអាទិ៍ ការគេចពីមណ្ឌលចត្តាឡីស័ក ការនាំមនុស្សគេចពីចត្តាឡីស័ក ក៏ដូចជាការមិនអនុវត្តតាមមន្ត្រីសុខាភិបាលជាដើម។ ច្បាប់នេះ នឹងផ្តល់ឲ្យ រដ្ឋាភិបាលមានឧបករណ៍អាចគ្រប់គ្រងប្រកបដោយប្រសិទ្ធភាពបន្ថែមទៀត ដោយក្នុងនោះ យើងដឹងច្បាស់ថា ការមិនគោរពវិធានការសុខាភិបាល ណាមួយរបស់ អ្នកមានជំងឺកូវីដ-១៩ អាចនឹងបង្កហានិភ័យដ៏ធំដល់សហគមន៍។ អាចនិយាយដោយសាមញ្ញថា បើដោយសារមនុស្សម្នាក់មិនស្តាប់ និងគោរពវិធានការសុខាភិបាល ដោយខ្លួនឯងដឹងថាអាចមានផ្ទុកវីរុសកូវីដ-១៩ ហើយទៅចម្លងគេតើយើងគួរគិតពីមនុស្សម្នាក់ ឬមនុស្សច្រើននាក់?»។
សេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវ ប្រកបដោយគ្រោះថ្នាក់ធ្ងន់ធ្ងរផ្សេងទៀត បានផ្តល់សិទ្ធិអំណាចមួយចំនួនដល់រដ្ឋាភិបាល ដើម្បីប្រើប្រាស់ក្នុងការទប់ស្កាត់ជំងឺកូវីដ-១៩ ឬជំងឺរាតត្បាតនានា។
មាត្រា៤នៃសេចក្តីព្រាងច្បាប់នេះ ចែងថា ដើម្បីឆ្លើយតបទាន់ពេលវេលា ក្នុងការប្រយុទ្ធនិងការទប់ស្កាត់ ការឆ្លងរាលដាលជំងឺកូវីដ-១៩ រដ្ឋាភិបាលកម្ពុជា អាចដាក់ចេញវិធានការមួយចំនួនជាបណ្តោះ រួមមាន ហាមឃាត់ការធ្វើដំណើរ ហាមឃាត់ការជួបជុំ ហាមឃាត់ការធ្វើពាណិជ្ជកម្ម និង ហាមឃាត់សកម្មភាព ការងារនៅកន្លែងណាមួយ ជាដើម។ មាត្រា៤នេះ ក៏បានផ្តល់អំណាចឲ្យរដ្ឋាភិបាល អាចបិទតំបន់ណាមួយ ដែលមានជំងឺកូវីដ-១៩ ឆ្លងរាលដាលដែរ៕
